Munchos anyos antes, no aviya agua limpya en las kazas. Sovre todo afuera del sentro de la sivdad, del todo. Aviya pozos i sisternas ke lo mas no eran limpyas. Se uzavan solo para limpyeza o lavados. I ke van azer la djente? Kada manko, traye un ofisyo. Se formo un ofisyo de “Saka”. Estos sakas eran vendedores de aguas. Los sultanes por azer mitzvas fraguavan fuentes en kada kartiye. Estas fuentes teniyan siempre agua limpya. El mas famozo sultan ke fraguo fuentes era Sultan Hamit. Por esto estas fuentes las yamavan Hamidiye Çeşmesi. Estas fuentes eran de marmor, bien dekoradas, kon figuras de flores i tenian eskrituras en letras dal tiempo. Serka de la eskola 1. Karma, eskola primera judiya ande se topa dainda una fuente de marmor blanko, dekorada kon tulipanes i se yama “Laleli Çeşme”. Una maraviya.
Vineremos a los sakas. Estos sakas inchiyan tenekes de agua limpya i los enkolgavan a los dos lados de un azno i kaminavan de kaza en kaza. Los ke teniyan de menester, los yamavan i aziyan vazyar estas aguas a las tinajas de barro. Un diya el sultan kito una ley ke kada saka va dar agua al kartiye de la fuente ke incho la agua. Estos sakas en vezes yevavan los tenekes en sus ombros. Teniyan un palo godro i largo, enkolgavan los tenekes a las puntas. I para ke no les de dolor de ombros, se metiyan tovajas godras debasho de este palo. Despues de tiempos salyeron damadjanas de vidro. Estas damadjanas eran aryento de sestos. Los sestos eran de kanyos trensadas. Kon tiempo estos sestos se enviyejesiyan i se ampesavan a derritir. I kuando el saka vazyava la agua a las tinajas, i estos pedasos de kanyos kayiyan aryento la tinaja. Por esto metiyan un panyo blanko limpyo a la tinaja i la agua se enfiltrava.
En el sentro de la sivdad no aviya este problem. Todos beviyamos las aguas de la fuente de kaza. Viniya del lago Terkos. Ma la sivdad se incho tanto i tanto ke mas un lago no pudo abasteser agua para tanta djente. Se bushko otras solusyones, otros lagos o barajes. I esto no abasto porke komo la sivdad de Estanbol ya es muy antigua, los buris ampesaron a burakarsen i por esto ampesaron a merkar aguas para bever. En verdad ke tenemos muy savrozas aguas de manador (kaynak). Kuando mos vamos a otro payiz, no topamos la savor de muestras aguas.
Agora las aguas se venden en damadjanas de poikarbonat transparentes, un sorte de plastik ma mas ijyenik. O en bokales de 1,5 litro, 3 litros, 5 o 10 litros.
Dizen ke shastre en piyes i saka en botika no puede ser. Por los shastres tienen razon. No se puede kuzir en piyes. Ma agora vemos ke saka ya puede ser en botika. En kada kaleja se topa una botika ke vende aguas aryento de estas damadjanes. Siempre ke paso por delantre, me viene este refran al tino.
