Ensupito me vino al tino mi chikez. Teniya 8 o 10 anyos. Mos viniya kuzendera a kaza, para kuzir a mi ermana i a mi madre kozas para la sezon. Dizeremos despues de Pesah se ivan a merkar ropas para enverano ke iva vinir. Abashavan a Sultanhamam ande aviya merkaderes konosidos ke vendiyan ropas en groso. Porke eran konosidos por hatir davan unos kuantos metros de ropa. Era una koza komo ritual. Porke no se ivan solas, se ivan 3-4 mujeres endjuntos para dar ideas. Diziyan, mira kon esta ropa te vas azer un fostan “Bras nu” kon el chichekli se aze muy ermozo “trois quart”. El Keten esta muy ermozo para azer fusta. Te puedes vistirla kon bluzas diferentes. Ansina tomavan 5-6 pedasos de ropas. En tornando ugradeyavan a Hadji Bekir, merkavan un poko de Akide shekeri, medyo kilo de Halva. En la koshe aviya Nimet Abla ke vendiya bilyetos de Milli Piyango (Loteria Nasyonal). I tornavan a kaza, kon un guste ke ya estan prontas para enverano ke viene. Despues se bushkava la kuzendera ke se yamava Havva, aziyan randevu para el diya ke va vinir. Kuando viniya el diya se arekojian unas kuantas mujeres de la famiya o de las amigas ke les viniya de la mano kuzir. En primero se eskojiya los modeles. La mas ermoza revista era Burda. Kuando davan el karar Havva, la kuzendera empesava a kortar kon tijera grande. Avriyan la makina de kuzir Zenit. En dizyendo se empesava a kuzir. De la otra parte mi madre entrava al mupak i empesava a aparejar la komida de midi ke van a komer endjuntos. El menu kada vez era mizmo. Porke a todos les plaziya este menu. Filikas o borek, despues kyoftes fritas komo İzmir köfte, allado arroz i salata. I yo me namorava de este menu. Yo era en estos diyas komo chirak. Ke aviya de manko, korre Djako tomamos del tuhafiyeci esta kolor de ilo. Torni 10 puntos despues, no me kedo Limon, korre Djako tomamos unos kuantos limones para la salata. Me plaziya azer estos echos porke me konsentiya ke esto valyendo para eyos. De una parte en aparejando las komidas, a mi madre la yamavan para azer la prova. De la otra parte tomavan la mezura del bel para azer la fusta de mi ermana. Eya keriya un poko kurto, las grandes tantis diziyan no, no esta bueno este karar de kurto. En fin komo se dize en Turko ne sish yansın ne kebap dos dedos ensima del diz desidaron. Ya viniya las oras de komer, yo i mi ermana aparejavamos la meza i komiyamos endjuntos. Ke dedikodus ke trayia Havva, de las otras kazas ande lavorava. Diziya mi madre ke este en ganeden Havva por mozotros kualo kontas a las otras kazas kuando te vas. Diziya no por mi vida aki es komo mi kaza ke va kontar. Vos kreyitesh? Este modo es la vida. En dizyendo se aziya las oras 5, mi madre aparejava el chay al lado kon kek i bishkochos. Antes de eskapar el uti beviyan el chay, i despues aryento de una ora ya eskapavan el echo. Todos kansados tornavan a las kazas. En todas las kazas me parese este diya de kuzendera se bivyo. Era otro keyf estos diyas. Despues kuando empeso la Konfeksiyon pronto, avagar avagar se alevanto este Ritual de las kazas, komo munchas kozas.
