El 17 mayo dia de alhad, el koro NES selebro su 20en anyo kon el fundador, Izzet BANA, en la eskola djudiya. Un koro de 28 dammas onoraron el chef, kon el profesor de kante, Nazım KERKEZ.
Bana lavoro 50 anyos en muestra komunita. El es el duayen de la muzika sefaradi i djugo en munchos teatros, una persona de muzika, el es la ormiga atomika de la komunita. Es el direktor empesando del anyo 1976 i kontinuo sus aktivitades de teatros amatores.
En el anyo 2004, el fundyo Las Estreyikas d’Estambol por transmeter la lingua a los chikos i chikas. Es en mizmo tyempo el fundador del groupo
Los Pasharos Sefaradis i el solisto.
Kon la ayuda del prezidente, Silvyo Ovadya i del Rabinato las Estreyikas fueron muy reushidas. En estos 22 anyos mas de 500 kriyaturas partisiparon.
Estas kriyaturas se ambezaron las teknikas de boz, la respirasyon i el ritmo de Nazım KERKEZ ke es un profesor de kante muy famozo i konosido.
İzzet tyene un archivo muy grande, albumes de fotografias i notas de investigasyones i dokumentos.
Nazım KERKEZ es shef de orkestra korrepetitor, pianisto. En mizmo tyempo el editor de las kantikas en ladino i en turko. Tyene klasas de kantos, es arreglador del koro. Ay dos anyos ke estamos lavorando i ayer fue el dia grande. 18 kantikas, 28 koristas, 5 ombres i las estreyikas.
En primero kero remersyar a Avi ALKAŞ ke es el prezidente del jurado para los sentros komersyales evropeos. El mos ayudo spiritualmente i materialmente por pueder lavorar kada djueves tres oras en un ofisyo de su edifisyo de ofisinas, en ofresiendomos kafes i te.
Para onorar İzzet Bana, asistyo por kantar kon su boz de seda a muestro koro, mizmo ke es un ombre de echo muy okupado.
Cenk ROFE es un mansevo ke puede kantar en 15 linguas, es un vokalisto i en mizmo tyempo es un kompozitor i letristo. I el asistyo para kantar 3 kantikas.
Semi GRANTİ, mansevo del koro de NES, vino tambyen por kantar kon Cenk Rofe. Tyene una boz muy ermoza.
Erol Eskenazi i Mimi Nahmiyas kantaron tambyen una kantika muy divertida.
Los elevos de Nazım Kerkez ke akompanyaron muestro koro, kuatro violonistos, un klarnet, dos violonseles i la perkusyon fueron prezentados por Avi Banas.
Fue un dia reushido yeno de muzika i muy spesyal para mi ke era mi kumpleanyos.
Despues kortimos las pastas todos endjuntos i mi amiga Ida Benromano me eskrivyo una poezia ke kero partajar kon vozotros.
Kerida Şeli,
Ke ermozo dia de selebrar tu kumpleanyos…
Djuntos Rosh Hodesh i la emosion del konserto…
Te oguro los dias de tu vida ke sean SIN DOLOR
TOMANDO LA SAVOR
SYEMPRE KON AMOR
NUNKA KE ESTES SOLA
SYEMPRE AKOMPANYADA.
Mersi muncho kerida İda.
Por terminar vos kero dizir ke de muestra komunita solamente Silvyo OVADYA, el Prezidente del Muzeo, mos onoro kon su prezensya i kon su ayuda materyal.
El haham Natan SİLİKİ kon su mujer Eti asistyeron tambyen.
Mersi muncho a los ke mos dyeron un apoyo moral, seya materyal, seya kon sus prezensyas i sus aplauzos.
