La fiesta de Shavuot es un dia. Ma komo estamos en la diaspora selebramos esta fiesta dos dias. Este anyo el sigundo dia de Shavuot es Shabat. Porke es “moed” no se melda la perasha de la semana. En Israel se va meldar la perasha de “Naso.” Mozotros meldamos una perasha de las fiestas ke se topa en el livro de Devarim. La perasha empesa kon los biervos de “Aser teaser” i mos konta las leyes de “maaser” ke es el dyezmo de la rekolta.
Esta fiesta no pasa kon el nombre de Shavuot. Savemos de el livro de Shemot ke el Santo Bindicho El mos disho despues de sinkuenta dias de la salidura de Ayifto vamos a observar a el Todo Poderozo en la montanya. Esta montanya pasa en la Tora komo “Horev” o komo “Sinay.” Moshe Rabenu resivyo primera vez la palavra de el Todo Poderozo en esta montanya. Sinkuenta dias despues de la salidura de Ayifto es la data ke selebramos el Shavuot.
Shavuot tyene otros nombres. En munchos lugares konosemos esta fiesta komo “Hag Matan Tora – La fiesta kuando se dyo la Ley”. I en munchos lugares se save komo “Hag a Bikurim.” La fiesta de los primeros frutos ke los yevavan a el Bet Amikdash. Esta seremonia era kon kantes i bayles i kon muncho alegriya.
El nombre de “Bikurim” es paryente kon el byervo de “Behor – el primer nasido”. En el livro de Devarim kuando mos embeza el orden de Bikurim el Midrash mos konta una koza muy enteresante. Komo mos konta el Midrash los ijos de Yisrael ke son los primeros nasidos de el Santo Bindicho El, toman las primeras frutas. Los ijos de Yisrael yevavan estas frutas a el lugar “uniko” ande se fraguo a el nombre de el Todo Poderozo ke es el Bet Amikdash en Yerushalayim. I los Kohanim resiven estas frutas a el nombre de el kriador ke es El solo i Uniko; komo se dize Ad… Ehad Ushmo ehad – ke es El uniko solo i su Nombre es uniko. Aki podemos ver la koneksiyon entre los Djudyos i el Kriador.
La fiesta de Shavuot se konta el empesijo de la enveranada. I ansi podemos augurar una enveranada buena kon salud, repozo, ganansya, pas en el mundo i en la tierra santa de Yisrael, amen.
Shabat Shalom i Moadim Lesimha.
