Ya pasimos un inviyerno buen yelado. Mos kansimos en los lavoros. La ekonomika i el hal de el mundo ya mos kanso bastante. Kuando viyene la Primevera avagar avagar se kaynta el aver i empesamos a guzaneyarmos para azer program de vakansas. Antes mos ivamos alos islas de Prensesas ke son Burgaz, Heybeli i Büyükada. Los Djudyos no prferevan de ir ala isla de Kınalı. Mas muncho los Ermenis preferavan de ir a esta isla. O por la parte de Anatolia a Caddebostan o a Suadiye mos ivamos. Despues empeso la moda de ir alos sivdades de Egeo komo Bodrum, Marmaris, Chesme, Ayvalık. En la mar de Mediterano mos ivamos a Antalya, alos kazales Alanyai, Belek, Kemer, Kash. Munchos anyos mos fuimos alos oteles de estos sivdades. Emprimero era muy ermozo azer vakansas en estos sivdades. Despues ke empesimos a salir ala Evropa moz embezimos de ir i kaminar a los paises de el Mundo. Vimos en indomos ke los presyos estan kaji komo los oteles i restoranes de Turkiyai i estamos tomandom mas buno servisyo i mostan amostrando entereso i muy sempatikos. Las komidas, los mezes los pishkados maraviyozos. Si dizej la mar komo vidro. Dishimos todo en savyendo no se kome kazik, por esto ay mas de 10 anyos mostamos indo a los islas de Gresya. Fin agora mos fuimos a Thassos, Lesvos, Chios, Samos, Santorini, Mykonos, Cretense i Leros. Mykonos i Santorini es mas luxos de los otras islas. Los presyos son un poko mas karos. Ma los otros islas son mas baratos. I los oteles, las plajes i tambiyen los restoranes. Kuando tevas a la plaj tedan chadir i shezlong. Si tomas unos kuantos kozas para komer i bever no te toman paras para los şezlonges. Si no vaza komer te toman 10-15 Euros para el lugar ke estas okupando. Si beves una Bira o una Frape yelada bile te puedes asentarse sin dar paras oras i oras. Los oteles son chikos i limpiyos. Te azen el servisyo komo estas en tu kaza. Si dizej por la noche, vos pudej ir a los Tavernas en el fin de la semana ay muzika en los tavernas diferentes. Si vej alos Tavernas, kon ke keyf te azen el servisyo los garsones. Envezes i eyos kantan, baylan, te azen shakas, si das orden muncho te dize ke estas azyendo. Es muncho no puedej eskapar. Toma 3-4 kozas despues si no vos artaj vos traygo diferentes kozas. Me akodro kuando moz ivamos a los restorantes de Bodrum o Chesme, dainda en entrando se pensava komo teva enkashar los presyos. Antez de dar el orden de los mezes empesa a dar savores un pishkado tengo de chupar los dedos. Komo keresh vos gizare. Frito o abafado o sino asado. Antes de enpesar a komer i azer un keyf ermozo ya te kita la gana en azyendo el servisyo. Te pensas komo mos va bezar kon los presyos. Esto no ay en los islas de Gresya. Komez beves, baylas tomas keyf no vos puedo kontar la ermozura ke pasatesh la nochada i los presyos viyene por persona aryento de 25-30 Euros. Vos do rekomendasyon si no vos fuitesh fin agora a los islas de Gresya este anyo aze program para irvos. En tornando me vaja bindizir porke vos di esta idea. Enveranada buena, kon salud i pas.
