El 10 de Mayo dia de alhad, el koro Nes tuvo el onor de asistir a un festival kon tres kantikas en Maltepe Türkan Saylan Kültür Merkezi.
Este festival nombrado SAN-SEV se aze kada anyo en el mizmo lugar.
En el anyo 2018 mos unimos yene kon el koro NES, ma dospues, ke desho la pandemia ke tomo la gerra no fue kismet. Este anyo el fondador del koro, IZZET BANA i el profesor de shan NAZIM KERKEZ, desidaron de ir i esta manera se realizo.
El festival fue organizado en tres dias, asisto mas de 300 koros, eskolas, ovras etc. Vyernes Shabat i Alhad. Izzet Bana prefero el dia de alhad. Ma la ora de salir a la shena la rijieron eyos. I mos kayo el goral de azer prova a las ocho i salir a kantar a las dyes de demanyana. Por esta razon fuimos ovligados de salir a las sesh de kaza para alkansar al servis. (Munchas grasias a SILVYO OVADYA por organizarmos el otobus).
Ya vos imajinash demanyana matrana 25 mujeres en un otobus, povereto del shofor. En fin ya arivimos al lokal, izimos la prova jeneral kon los enstrumantistos i djusto a las dyes salimos a la shena.
Las palmas mos izo olvidar toda la kanserya. Un grande remersimyento a muestro shef IZZET BANA i a NAZIM KERKEZ ke mos aparejaron a este dia i un grande abraso a todas las koristas de “NES”.
Keridos lektores, si keresh sintir las tres kantikas del festival i munchas mas, vos asperamos al 17 de Mayo dia de Alhad a las 19:00 al konser del 20en anyo del koro “NES” en el oditoryum de la eskola.
