En 1917, en el lodo de Polygon Wood, un mansevo soldado australyano se estuvo para enterrar su ermano kon sus manos i lo embrujo kon una kuvyerta. Noventa anyos despues, la tierra torno atras, egzaktamente komo su ermano Jim la avia deshado.
Dos ermanos de Nueva Gales del Sur, Jack i Jim Hunter, estavan gerreyando ombro kon ombro en una de las atakas las mas sangrientas del Frente Oest. Kuando Jack se murio, Jim no kontinuo a gerreyar kon el resto de la kompanyia. Se areto. En medio de las balas i las bombas, embrujo su ermano en una kuvierta. Le dublo los brasos en el pecho, kon karinyo. Lo enterro komo se enterra uno ke amas i no puedes desharlo komo si fuera nada. Despues, torno kon los otros soldados para gerreyar.
Jim sovrebivio la gerra. En 1919 torno a Beljika kon un solo buto: topar el lugar ande avia enterrado a Jack. Bushko dias i dias en la tierra arreboltada, ma no topo nada. La tierra avia englutido la tomba. Torno a kaza sin topar lo ke keria. Yevo esta karga toda su vida.
En 2006, serka de Polygon Wood, unos lavorantes toparon una koza ke los detuvo. Debasho de la tierra ordinaria de Beljika, estavan asperando en silensio, sinko soldados de la Primera Gerra Mondial. Los kuatro fueron enterrados de punta. Ma el sinken estava diferente de los otros: estava embrujado en una kuvierta, los brasos en el pecho. El ke lo enterro lo enterro kon amor.
El arkeologo Johan Vanderwalle fue yamado. Le izieron provas de DNA. El rezultado: Jack Hunter, de Nueva Gales del Sur. La famiya les konto un detalyo: Jack no se avia ido solo a la gerra. Su ermano Jim estava kon el. Jim fue el ke lo enterro kon sus manos.
Jim en 1919 no lo avia topado. Ma Jack estava aya, asperando, embrujado en la kuvierta, komo Jim lo avia deshado.
Johan Vanderwalle, se emosiono tanto de este amor entre los ermanos, ke no kijo ke la istoria se eskape kon un rezultado de DNA i un enterro militar. El i sus amigos krearon el Projekto "Monumento de los Kompanyeros de Armas". Un artisto australyano izo una estatua de bronzo, amostrando Jim abrasando Jack por la dalkavo vez. La estatua pezo 800 kilos i kosto 160.000 euros. Kada gramo es un monumento a lo ke sinyifika amar a uno tanto, ke aretar a gerreyar, mezmo por un momento, para ke no kede solo en el lodo.
El 25 de septiembre 2022 —105 anyos duspues de la Batalya— el monumento fue inogurado en Zonnebeke, serka del kafe de Johan. En el muzeo, puedesh meldar la istoria de los ermanos: puedesh ver kaskos, balas, fotografias i dos aniyos de bronzo echos de kovanes; simbolo de dos ermanos ke gerreyaron endjuntos, malorozamente separados por la muerte ma nunka de verdad apartados.
El spiritu ANZAC nunka se demuda. I la istoria de Jack i Jim Hunter tanpoko. Dos ermanos de Nueva Gales del Sur, se enterraron en la gerra endjuntos, i a la fin, nunka se separaron.
