En estos diyas dalkavo kuando avrimos las gazetas o las televizyones, mos topamos kon haberes de asasinos i violensias. Muestros korasones se azen negros i ampesamos a demandar: Ande vamos? Maldad ya aviya en los tiempos de antes tanbien, ma oy parese ke la djente esta mas inyervoza, mas impasiente. En la kaye, en el trafiko, en las eskolas i asta aryento de las kazas vemos ke una chika diskusyon puede tornar a una grande trajediya. Esto no es solo una kestyon de siguridad, es tanbien una kestyon de moral, respekto i umanidad.
Los viyejos diziyan una palavra: El respekto aze al ombre verdadero ombre. De verdad no son solo las leyes ke sostienen una sosyedad. El respekto, la piyadad i la konsiensia entre las personas son tan emportantes komo las leyes. Oy en diya muncha djente al lugar de oyir, prefera gritar; al lugar de entender prefera ofender. La djente se izo impasyente. Kada uno pensa en si. Ay munchas razones para esto. Las difikultades ekonomikas, el espanto del futuro, i la medya tienen a la djente siempre en tension i kompetensia. Espesialmente los mansevos estan debasho de una grande presion. Ven kontinualmente imajes de violensya en el internet i normalizar los insultos diminuye la empatiya. El ombre en vezes se olvida ke tiene enfrente de si una otra alma biva. Las jenerasyones ke kresen detras de los ekranes, se ambezan mas manko la pasensya i el avlar kara kon kara.
Kero dizir ke el rolo de las famiyas en la edukasyon i engrandeser a sus ijos es muy importante. Las kriyaturas no se edukan solo kon lesones ma tanbien kon egzemplos. Un ijo ke no ve respekto en su kaza, komo va ambezarse a respektar otros. En una sosyeta ande se grita a los grandes, i se machukan los chikos, la pas se piedre. En otros tiempos la vizindad, la kultura de maalle, la verguensa i la solidaridad sosyal eran lienes ke no se viyan, se sintiyan, deteniyan a la djente. Agora muncha djente se siente sola i la soledad en vezes aze kreser birra.
Ser amavle kon una persona, ensenyar piyadad a una kriyaturika, mostrar respekto a un viyejo, todo esto tiene valor. Porke ansina komo la maldad se apega, la buendad tanbien se apega. Kuando se piedre la moral, no solo se piedre la pas, ma tanbien una parte de muestra umanidad.
Sigun mi, no solo el puevlo, i los ke estan en la kavesa de las medyas, las eskolas, los filmos kale ke se enderechen a si mizmo. Kale eliminar este modo de filmos kon armas, kuchiyos. Deke se va un ijiko a la eskola kon kuchiyo en la aldikera? Los paryentes durmen? Deke djugan djugos kon matansinas? Estos djugos de las televizyones, todos son bazadas en matar. Estos djugos enduresen los korasones. Por esto ampesando de los paryentes i los profesores, kale tener los ojos en ventikuatro a observar los movimientos de los ijikos desde los anyos chikos.
