Por sinko palavras yo deshi “un buen ombre”. Mi nombre es Sarah, tengo 39 anyos i en tres diyas, vo afirmar los papeles de divorsio. Mi madre esta yorando en el telefon. Mis amigas estan en shok. Estan murmureando: “Ya estas segura?". Mike no es un bebe. No me enganyo. Tiene un lavoro regular. Es entrenador en la liga de los chikos.”
Es verdad. Mike es un buen ombre. Ma yo no esto deshando un ombre negro. Yo esto metiendo a la puerta un empleado inkapache. El problem de Mike i de miliones de maridos se rezume en una sola fraza. Una fraza ke por dodje anyos me lo komyo el sistem nerviozo gota por gota: “Mi amor, dizeme lo ke devo de azer.”
Mike “ayuda.” Si yo le digo, el inche la makina de platos. Si yo le akodro, se va a tomar los chikos del entreno. Empesa a lavar el lavado, ma kale ke demande kual boton va pizar i ande esta el deterjan. Kada vez es esto. El aze el echo, yo so el direktor. Yo so el CEO de la “Kompania de la Famiya”, i el es el pratikante ke despues de diez anyos no save ande estan las tovajas.
El martes pasado, la bomba finalmente patladeo. Estavamos komiendo. Alevanto la kara del telefon i me demando: “Sarah, el aniversario de mi madre es este alhad. Kualo le merkaremos?” El piron me kayo de la mano. Es su madre. No es mi madre. I en su kavesa, la responsabilidad de akodrarse la data, de bushkar un regalo, de merkarlo, de empaketarlo i de afirmar la karta es mi responsabilidad. Su sola kontribusion es vinir a komer el gató.
No griti. Solo lo miri en la kara i le demandi: “Mike, ke numero de kalsados tiene muestra ija?” Paresio konfuzo. “No se Sarah. Deke me estas demandando? “Kualo es el nombre de la maestra de muestro ijo?” Silensio. “La aseguransa del kamyon ke tu kullaneas kada dia, kuando se va eskapar?” Nada. “Kuantos anyos va tener tu madre este alhad?” Ezito. Deviya kalkular. Sonrio. “Estas egzajerando! Si me lo dizes, yo me vo al merkado!”
I aki, esto es el punto: “Si me lo dizes…” Esto es la karga mental. Me kansi de pensar por dos personas. El pezo de tener la mapa mental de toda la vida, i el va bivir komo un pasajero. Esto kansada. De ser la sola ke va ver ke kale ke merkemos leche. De ser la sola ke save ke el perro tiene menester de vaksina. De engrandeser tres chikos, inkluido el uno de 42 anyos kon karné de konduzir i plan de retiro.
Yo lo esto deshando a Mike porke kero tornar a ser mujer, no direktor de kaza 24/7. Yo me esto indo porke prefero azer las kozas difisil sola, ke azerlas saviendo ke todo depende de mi, kon un “ayudante” ke en realidad me esta viendo komo una bolsa de piedras. Va ser madre sola? Si. Ma por lo menos, no va a ser madre de mi marido.
Mi nombre es Sarah. No tengo menester de un ayudante. Tengo menester de un kompanyero. I por dezgrasia, los solos ke entienden la diferensia son las mujeres tan kansadas ke no tienen fuersa para eksplikarlo otra vez.
