El tokar de una persona es uno de los dezeyos mas antiguos i profundos de su egzistensya. Desde el momento ke nasemos, el primer kontakto ke azemos kon el mundo es por medio de tokar. Kuando una madre abrasa a su kriyatura, siente la kalor del puerpo i el kontakto de la piel dan un sentimiento de seguridad antes ke las palavras egzisten. Por esto el tokar no es solo un akto fiziko, es un puente egzistensial.
Tokar es una manera muy direkta de sintir ke no estamos solos. Una mano sovre el ombro, un apretar de manos, un abraso pueden ekspresar lo ke munchas palavras no pueden dizir. El tokar es una lingua mas aya de las palavras. En vezes la djente no saven ke dizir ma un “toke” puede dizir aki esto.
La vida moderna munchas vezes eskonde esta nesesidad natural. En las sivdades grandes la djente pueden estar muy serka una de otra, ma emosyonalmente muy leshos. En la vida de agora dar la mano puede ser solo una formalita, es superfisyal. Ma en el fondo la persona tiene menester de un kontakto, kayente i sinsero, verdadero. Si no, mos keda aryento un vaziyo sin ke mos apersivamos.
Siguro ke el dezeo de tokar deve tener limites. Para ke un kontakto seya bueno i sano, es menester el respekto i la akseptasyon del otro. Sin esto el tokar puede tornar a una eksperiyensa inkonfortable. Por esto es emportante de saver kuando, komo i a ken tokar.
Kuando mos vamos a una botika o al bazar, miramos lo ke venden i no mos abasta, keremos tokarla. Mizmo si no la vamos a merkar, la tokamos i la deshamos. No mos abasta mirarla.
En konkluzyon el dezeo de tokar es una parte esensial del ser umano. En vezes mos ayuda a ekspresar muestras emosyones. No devemos olvidar ke este akto es simple ma poderozo. Porke en vezes un solo “toke” puede dizir mas ke todas las palavras.
