Anet Pase, psikologa i antrenora de meoyo
La komida es nutritiva. No es tadre para ampesar de una sierta edad, tomando kamino para enviejersermos. Es importante azer atansion a lo ke metemos en muestros puerpos. Lo ke komemos mos prepara una vida aktiva, sana i biva. Ama esto no sinyifika ke deven ser sin savor. Ay tres dietas muy importantes ke son apropriados al klima de Estambol i son konvenivles de merkar las verduras ke se sembran aki. Se topan syempre en los marketes o en los fruteros. Esto es importante para azer uzansas.
Dieta del Mediterraneo
Dieta de Dash
Dieta de Mind
Estas tres dietas son kaji las mizmas. Tyenen muy pokas diferensiyas. Para empesar es buena la dieta Mediterraneo. Es una dieta de syete paizes ke son en bodre de mar i el puevlo son sanos i bivos. Proteja la salud del korason i de las venas. Es una manera de vida. Los prinsipales son de komer frutas i zarzavates freskas i en su tyempo. Komer syempre kon azetes buenas komo la de oliva. Komer sereales. Komer muncho peshkado ma no frito i poka karne. No asukar i no komer komidas de paketos.
Esta diyeta abasha las enflamasyones de tu puerpo, viene bueno a tus intestinos, te dan enerjia para ser mas biva durante el diya.
La dieta Dash tyene diferensia un poko de esta dieta ke limita el sodyum. Limita el asukar simple i el karbonhidrata. Konseja utilizar sereales ke tienen el indeks glisemik basho. Todo el dia utilizar solo una kucharika de sal. Porke esta dieta es para melizinar la hipertansiyona.
La dieta Mind. Mos da konsejos de la dieta Mediterraneo i de la dieta Dash. Las dos dietas son meskladas. Es para mantener un meoyo sano. Aunke el meoyo representa solo el 2% del pezo korporal, konsume entre el 20% i el 30% de la enerjia ke tomamos. El objektivo de esta dieta es, diminuar el riziko de tener Alzheimer, Parkinson o Demans.
Mas muncho se prefera komer verduras oskuros. Mas muncho frutas de kolores morales. Komo frutas de sharas. Frezas, moras salvajes, frambuazes…, komer frutas sekas sinko vezes a la semana, azete de olivia, tres vezes a la semana sereales kompletas i peshkados komo somon i sardinas. No komer muncho kezo, si keresh a la semana una vez, no komer muncha karne kolorada, no komer komidas fritas. Si te trava muncho dulsuria a la semana dos o tres vezes ya puedes komer una dondurmayika o una borekita.
Las komidas muestras ke estan eskritas en el livro “Komidas Sefaradis” o el livro “Komidas de İzmir” son muy saludozas. Porke las komidas Sefaradias se kozen avagar en la lumbre o en el orno. Son mesklados kon diferentes verduras i poka karne. En un chini kozido bueno se puede topar i la verdura i el sereal i la azete de oliva. Todo djusto. Son savrozos i mos dan el bienestar.
Un egzemplo: Espinaka Kon Avas:
1,5 kg de espinaka
1 kupa de avas sekas
1 findjan de azete de oliva
1 kuchara de sos tomat
Un punyo de sal i pimyenta
Si te plaze i sevoya
Las avas kale meter en mojo de una noche antes. Se buyen un poko. Las espinakas se lavan bueno, se kortan menudos, en un sarten la azete kon la sevoya menuda se sofriye un poko i se adjusta la sos tomat para ke salga la golor. Despues adjusta las avas i las espinakas. Adjusta la agua kon karar no muncho para ke la savor kede aryento. Despues en lumbre basha deshalo fin a ke se kozga.
Esta komida aryento tiene todo bueno. Salud i beraha.
La komida Sefaradi es saludoza i no se va nada al chop. Azes komida de espinaka i de los ravos se aze otra komida. Un poko buyir los ravos. Mesklar kon sevoya sofrita kon azete de oliva. Adjusta limon, se aze una salata o una komida ke se puede komer yelada.
Afilu preparar una komida es mantener un meoyo saludozo. Porke vas a pensar de merkar lo ke es menester, vas a salir a la kaye, te vas a preparar esto todo i esto todo te traye tu salud.
El profesor Osmanoğlu syempre mos konseja, no kedarmos, syempre estar en movimyento.
Eskaparemos kon una dicha: De tu pan no me arti, de tu palavra me kontenti.
Ke tengamos mezas largas kon muestras famiyas, kon amigos kerensyozos kon komidas saludavles i kon konversasyones dulses.
