Aristo dize ke la mano es “el instrumento de los instrumentos”. El konsidera ke la mano fue un regalo de la natura i asi el umano fue favorizado de ser el mas intelijente de su espesia. Es el primer instrumento ke permete a krear, a produsir, a fabrikar i a utilizar otros instrumentos i mekanizmos. La sinerjia ke egziste entre las manos i el serebro (el meoyo), yevo a una evolusion ke izo la diferensia entre el ombre i los animales. Esta mano umana fue el motor fundamental de la sivilizasion. A parte la natura del mundo, todas las maraviyas ke vemos, son konstruidas a baza de las manos. Estas manos en kreando, transormando sus rekuerdos en kultura, ayudaron al developamiento del serebro i asi al developamiento de la intelijensia.
Las manos, a parte de sus kreasyones tienen sentimientos. Kon las manos damos vida a las ideas i emosyones. Los movimientos libros al avlar ayudan a formular el pensamiento. La prova es ke estos djestos kontinuan de mizmo, kuando una persona aze una konversasion telefonika. Las manos mostran lo ke keres dizir. Es una manera de reflektar la psikolojia interior. “Echar una mano” es dar konfiensia, tener “manos de oro” es tener munchas kapachedades, kaminar avagar kon las manos detras es pensar i krear ideas muevas. Las manos, una ariento de otra,
refletan la pas interior o la konsantrasion emosyonal. Kon su fuersa i sentimiento es un instrumento ke ayuda a la terapia del organizmo ke es el masaj. Tener la mano de un otro, amingua la soledad.
Una mano sovre la kavesa mos da enerjia pozitiva. Estos egzemplos son sin fin i entre tiempo, muestras manos kontinuan a dar i a resivir la enerjia de la vida.
“Las manos bendichas” ke seyan kura para la umanidad, yenas de amor, fraternidad i proteksyon.
