La ekspozisyon esta reuniendo la memorya vizual de Izzet Keribar, ke abarka mas de medyo siglo kon la atmosfera fasinante de la Evropa Sentral.
Esta ekspozisyon se avyo el 02.04.2026 en la Galeria Işık en Teşvikiye.
Izzet Keribar tyene 90 anyos i esta kontinuando a produsir. En esta egzibisyon esta reinterpretando la atmosfera temporal de PRAG i BOHEMYA, a traverso su propyo lenguaje vizual.
La ekspozisyon, ke reune fotografias de los viajes del artisto en diferentes epokas, i de su viaje el mas resiente, invita al espektator a un viaje a traverso la istorya, la luz i la memorya.
En el kuadraje de Keribar, Prag no es solamente un plano de istorya, Prag esta bivyendo en sus fotografias.
El artisto deskrive la ekspozisyon komo un viaje ke refleta tanto su admirasyon por esta rejyon, komo el mundo interyor de un fotografo.
Kon kaji 1.5 miliones de fotografias en su archivo, Keribar prezenta en esta ekspozisyon una seleksyon espesyal ke abarka desde el pasado asta el prezente.
Las fotografias ke aunan la arkitektura, la istorya i la vida kotidyana, revelan la perspektiva kada vez mas profunda i la maestria ke el artisto developo a lo largo de los anyos. Esta ekspozisyon fue realizada kon las kontribusyones i el apoyo de la Republika Cheka i del Konsulado Jeneral de Estambol.
Se puede vijitar en la galeria fina la fin del mez.
Izzet Keribar es un fotografo profesyonal. El resivyo numerozos premyos prestijiozos. El gano por el Ministeryo de Kultura Franseza la Medalya de Lejyon d’Honneur, en mizmo tyempo reushidades akademikas, titulo de kavalyero.
Keribar kon su metikuloza vista, kreyo un visual perfekto enriva de sus fotografias. Una grande multitud de vijitadores, munchos nombres del mundo del arte, reprezantantes konsulares vijitaron esta egzibisyon kon grande plazer.
Izzet Keribar en su avla, afirmo ke Praga i Bohemya son para el muncho mas ke una sivdad u una rejyon.
Keribar afirmo ke esta rejyon ofrese una narativa unika ke la luz, el tyempo i la memorya se entrelasan.
Esta prezentando al espektator la estetika atemporal de Prag i la atmosfera de kuento de la Bohemya a traverso de un poderozo lenguaje vizual.
La ekspozisyon prezenta fotografias tomadas por el artisto en partikular durante sus viajes, ande estamos vyendo los detalyes arshitektonikos, las teksturas istorikas i las shenas de la vida kotidyana.
Izzet Keribar es un maestro ke syempre aze su profesyon kon una grande pasyon, kuriozita i entuziasmo.
En kada fotografia puedemos apersivir esta profondita.
Komo le plaze muncho viajar, en sus ovras puedemos ver las fotos i los viajes. El refleta estas dos pasyones suyas, de la mijor manera posivle a traverso sus fotografias.
Este mez el va selebrar su dia de nasimyento.
Dezeo ke su pasyon por los viajes i su karyera profesyonal kontinuen durante munchos anyos mas, i ke tenga una vida sana i oroza endjuntos kon su famiya i sus keridos.
