La semana pasada, Erev de Yom Hashoah, resivi un video entitulado “Matar Djudios”. Aki syertas partes de este video:
- Baylando en matando Djudios…
- Kreyo ke mati a lo manko sesh o syete…
- Puedes matar Djudios i meterlos todos al orno…
Sintir estas palavras en 2026 no puedeser, avera una eksplikasyon dishe entre mi… I miri lo ke puede ser.
Segun un diksyonaryo Espanyol, “Matar Djudios” es una tradisyon ke se selebra durante la Semana Santa en la provensa de Leon, al norte de la Espanya, spesyalmente en la sivdad de Leon i sus doredores, durante la kual los partisipantes beven limonata leoneza, ke konsiste prinsipalmente en limonada, vino kolorado i sukreriyas.
Para mi este nombre es ofensivo i una kontinuasyon de stereotipos antisemitos… I de mas en ambezando el orijen…
La violensya durante el siglo XII kontra el distrikto Djudio de Leon por los reyes Alfonso VIII de Castilla i Peter II de Aragon, ovligo a los Djudios de la sivdad a mudarse al distrikto de Santa Ana. En 1196, el distrikto Djudio de Leon fue destruido.
La versiyon la mas konosida sovre los orijenes de esta tradisyon provyene de la istoriadora Margarita Torres, de la Universidad de Leon. En el siglo XV, el resentimyento kristiyano en Leon por las devdas a los Djudios, los emprestamyentos kon los judios i el fervor antisemita jeneralizado despues de la Pesta Preta avryo la puerta de la violensa kontra la povlasyon Djudia durante la Semana Santa. En 1449, un novle de Leon, Suero de Quinones teniya una devda muy grande a un Djudio. Para evitar el pagamyento, Quinones insito a la povlasyon kristiana kontra los Djudios, enspirado por la teoría konspirativa antisemita ke los teniya komo responsavles de la muerte de Jesus. El Jueves Santo i el Viernes Santo, Quinones i sus amigos atakaron el distrikto Djudio i mataron a munchos, inkluido el ke Quinones deviya una grande suma. Para selebrar el pogromo, Quinones i sus segidores se arekojeron para fyestar i bever vino.
Otra teoriya dize ke, durante la Edad Media, la povlasyon kristiana lokal de Leon bushko a vengarse de la povlasyon Djudia del distrikto serkano a Humedo, enspirada por la kalumniya del deisidyo. Para arepintir a los rebelyones, las otoridades lokales permityeron la vendida de bevidas alkolikas, inkluyendo el vino spesyal ke se konosiya komo limonata leoneza. Los rebelyones se emborracharon i no kontinuaron kon el pogromo.
Segun la Federasyon de Komunidades Djudias de Espanya, este nombre aziya referensiya a las egzekusyones publikas de Djudios despues de los djuzgos falsos ke se realizavan en la epoka de Paskua durante la Edad Media.
La sivdad de Leon selebra su fyesta "Matar Djudios" el Viernes Santo, komo parte de la Semana Santa, ke dura diez dias. Asta 16.000 personas konsumen kaji 40.000 galones de limonata leoneza durante las selebrasyones. Esta bevida se sirve en kaji todos los bares del sentro de la vida nokturna de la sivdad, ke inkluye dos kayes del istoriko distrikto Djudio.
Segun la tradisyon, los partisipantes beven 33 vazos de limonata entre el Viernes Santo i el Alhad de Resurreksyon, en komemorasyon de la edad kuando muryo Jesus. Tambyen es una tradisyon ke los ke beven la limonata digan ke van a "salir a matar Djudios".
La organizasyon kultural Djudia Tarbut Sefarad demando ke se abandone esta tradisyon, ma la povlasyon de Leon en jeneral dize ke este nombre no es antisemita i ke las manifestasyones aktuales de la selebrasyon no reflektan sentimyentos antisemitos! En Turko se dize “külahıma anlat”!
