El ser umano tiene una personalidad muy kuryoza; entiende la valor de una koza solo kuando la piedre o kuando siente su falta. Kuando la tenemos en la mano, mos parese muy komun, komo si fuera ke siempre va estar aya i nunka se va ir. Ma la libertad, ke es la djoya mas briyante i mas presyoza ke la vida mos ofrese, es egzaktamente ansí. Kuando esta al lado de mozotros mos olvidamos de su valor, ma si se fuye de los dedos por un momento, todas las kolores de la vida se mueren.
Una Libertad en una Area Ancha
No ay ke bushkar la libertad solo en los grandes konseptos politikos; es una area grande i ancha en kada punto de muestra vida. Este sentimiento empesa en la kriansa, kon la inosente dezesperasion de no poder alkansar al djuguete ke tanto keres. A vezes, mos da en la kara kuando tenemos mala salud i no podemos komer el plato ke dezeamos o no podemos salir a kaminar komo keremos. I a vezes, por la pezgades de las ovligasyones i responsabilidades sovre muestros ombros, nos damos kuenta ke la libertad es una djoya de lukso kuando no podemos dar ni un paso en la direksion ke mos dize el korason.
Liberarse de los Dezeos
Munchas vezes pensamos ke la libertad es korrer komo keremos en un kampo ancho, i azer todo lo ke mos da la gana en akel momento sin freno. "Azer todo lo ke keres" parese algo muy ermozo al prinsipio, ma en verdad esta definision nos puede yevar sin dar de vista a una esklavitud mueva: la esklavitud de los dezeos sin kontrol. Una persona ke su mente i su alma estan siempre korriendo detras de algo, en verdad esta prizyonera de sus propias pasiones.
La Fuersa de Dizir "No"
Ma la verdadera libertad no se topa en las aksiones de boz alta o en el konsumo sin limite; se topa en un "no" dechidido i fuerte. Un ombre ke es de verdad libre, no es solo el ke aze lo ke kere; es la persona ke no esta ovligada de azer lo ke no kere. En el momento ke podemos estar fuertes kontra las presiones de la sosiedad, kontra las ekspektativas de los otros o kontra la boz interior ke dize "ke va dizir la djente?", es en akel momento ke muestra djoya briya mas ke nunka.
La Boz de la Konsensya
Poder mover por si solo, mirar solo al espejo de la propia konsensia al tomar una dechizyon; esto es la verdadera libertad. En el bruido del mundo moderno, guadrar muestra propia boz i refuzar de ser un figurante en una vida ke no keremos, es la viktoria mas grande del alma. No devemos olvidar ke la libertad no es un regalo ke otro nos da, es una onra ke ganamos guadrando muestros propios limites.
Ay ke dar de vista a esta djoya presyoza kuando esta entre muestros dedos; no la tenemos ke sakrifikar ni al bruido de los dezeos, ni a los rafes empolveados de las ovligasyones. Vos abraso kon alegriya.
