Vincent Van Gogh, muryo a los 37 anyos en una chika kamareta ensima de un kafe fransez. En su poka vida ke bivyo, lo ke vendyo solo un tablo. Dingunos no keriyan merkar sus ovras maraviyozas. Solo su ermano Theo, kreiya en su talento ma malorozamente Theo, muryo dospues de sesh mezes de la muerte de su ermano a los 27 anyos.
La mujer de Theo, kon su veluntad, troko la istorya del arte para syempre. Ma dingunos no konosen su nombre.
Dospues de la muerte de estos dos ermanos, lo ke kedo fue kaji syen letras i una kamareta en Paris yena de tablos.
Esto fue la sola erensya ke le kedo a la bivda de Theo, kedo sola, amarga de dos muertes i kon una kriatura rizin nasida.
JOHANNA VAN GOGH-BONGER.
Dingunos no la forsaron ke tome la responsabilita de estos tablos ke no los kerian dingunos. Si era otra los vendiya por debaldes i kontinuava a su kamino. Ma Johanna remarko ke estos tablos eran muy valutozos.
Johanna Bonger nasyo en 1862 en una famiya olandeza. Eya era entelijente i ambisyoza. Para akea epoka meldo universita i se izo profesora de Inglez.
A los 23 anyos se konosyo en Paris kon Theo Van Gogh i se kazaron en 1889. Un anyo dospues Theo muryo. Johanna lo ke teniya era 28 anyos, no teniya paras, estava triste, kon una kriatura chika, se enstalo en la kamareta de su kunyado Vincente yena tablos ke no se vendyeron.
En primero empeso kon las letras de Vincente i Theo.
Las traduizo al Inglez, al Fransez i las mando a syertas revistas. Kon tyempo vido ke kon estas letras el mundo empeso a verlo a Van Gogh de otra manera. Dospues tomo en mano los tablos. Organizo ekspozisyones, eskrivyo a los kritikos de arte, i los konvensyo ke Vincente no era inyervozo i agresif, ke era una buena persona.
Nunka los vendyo a presyos baratos aunke teniya menester de paras. 35 anyos peno por esta erensya, syempre kreyo ke son valutozos.
Kuando Johanna muryo en 1925, Vincente Van Gogh teniya una fama maraviyoza por el mundo entero. Sus tablos estavan en los muzeos.
En el muzeo Van Gogh de Amsterdam, la koleksyon guadrada por Johanna egziste oy en dia.
Johanna nunka no pinto ni un kuadro ma lo kreo a Vincente Van Gogh. Sin eya, su nombre iva ser olvidado.
Ken puedia saver kon la rezolusyon de una mujer korajoza i kon unas kuantas letras, dospues de su muerte iva naser un pintor olvidado.
Me demando. Ke karar de djente konosen este nombre: JOHANNA VAN GOGH BONGER?
