En los anyos 1930, una chika ijika no se estava puediyendo estar en un lugar en la klasa. Siempre estava en movimyento. No estava puediyendo konsentrarse en sus lisyones. Estava dezrepozando las otras kreaturas.
Las maestras kedaron sin remedio. Eskrivyeron una letra a la famiya dizyendo ke estavan pensando ke Gillian teniya un dezorden de atansion. Les estavan konsejando de meterla a una eskola espesial.
Oy, este dezorden lo yamamos DEHB (Defisit de Atensión i Hiperaktividad). Ma en los anyos 1930, esta definision no egzistiya. No aviya etiketas, ni kura por esto.
La madre de Gillian, kon grande ansya, izo lo ke kada madre aze en esta situasyon. La vistyo, le ato los kaveyos i la yevo a un doktor.
Gillian, anyos duspues, se estava akodrando esta vijita muy vivamente. Estava en un ofis grande, kon livros de kuero en la livreriya. Por vente minutos, Gillian se esforso a tener las manos endjuntas i estar kayada. Entremientes el doktor estava demandando a su madre de kontar sus problemes: sus movimyentos sin fin, i sus notas negras.
Duspues, el doktor izo una koza ke dingunos asperava. Disho ke keriya avlar kon la madre en privado. Le disho a Gillian ke espere en la kamareta. Ma antes de salir, alargo la mano i avriyo la radyo ke estava en la meza.
Salyo kon la madre al koridor, serro la puerta i por la ventana le izo sinyal a la madre: — “Solo mirala,” disho a boz basha.
En el momento ke salyeron, Gillian se alevanto. Empeso a baylar en la kamareta. Su puerpo estava respondyendo a la muzika kon alegriya pura i intensiva — estava saltando, se estava meneyando kon grande alegriya. Gillian no se dyo kuenta ke la estavan mirando.
Duspues de unos kuantos minutos, el doktor se torno a la madre i le disho: —“Su ija no tyene dingun problem, Senyora Lynne. Metela a una eskola de bayles.”
I la madre oyo su konsejo.
La primera vez ke Gillian entro a la eskola de bayles, topo una kamareta yena de djente komo eya. Anyos duspues, se estuvo akodrando: “Todos eran koma mi. Kaliya ke izyeran movimyentos para pueder pensar”.
Este momento de konsiensia avriyo las puertas a una vida de grandes reushitas. Kuando teniya 16 anyos, fue notada bayladera kon la Kompanya de Molly Lake i fue envitada a Sadler’s Wells Ballet. Kuando teniya 20 anyos, izo su primer solo grande en La Bella Durmiente en la Royal Opera House. Tomo el rolo de una balerina dramatika kon roles poderozos komo la Reina Negra en Checkmate i la Reina de las Wilis en Giselle.
En 1951, se separo del Royal Ballet i se izo artista en el London Palladium. Mezklo el ballet klasiko kon djazz i bayle moderno, azyendo movimyentos instinktivos, i emosyonales.
En 1981, gano el premio Olivier por el Sukseso Ekstraordinaryo en Muzikales. The Phantom of the Opera fue el show ke estuvo en la shena el mas largo tyempo en la istoria de Broadway.
En 2014, a los 87 anyos, el governo ingles le dyo el título de Dame Komandante de la Orden del Imperio Britaniko por sus servisyos al bayle i al teatro muzikal.
I en 2018, el teatro New London, kaza orijinal de Cats, fue renomado Gillian Lynne Theatre. Gillian Lynne se muryo el 1 de julio de 2018 a los 92 anyos, deshando un patrimonyo ke transformo el teatro muzikal i trusho alegriya a milyones de personas en el mundo.
Todo esto, porke en los anyos 1930 un doktor avryo un radyo i vido lo ke dingunos no aviya visto. Eya no era un problem para ser korijado. Era una bayladera esperando ser liberada.
Kada kreatura ke se syente malentendida, merese topar alguno ke veyga un talento en lugar de un dezorden, i ke le ayude a transformar su ansya a sus mas grandes viktoryas.
