Munchas vezes me fui a Israel. La primera vez kuando teniya 13 anyos despues ke ize Bar Mitsva, me fui i despues puedo dizir ke me fui 6 o 7 vezes. Puedo dizir ke kamini Israel entero, solo a Eilat no me fui. Mas muncho pasi el tiempo en Tel Aviv. Me plaze kaminar komo los batales en las kayes. Allenby, Dizengof, Tahana Markazi ke es el sentro de los otobuses, tambiyen i el viejo me plaziya muncho. Me iva a komer borek en el Sarıyer Borekchisi ke aviya aya. Era komo “Bit Pazarı”. Gritavan “Kol davar be shtayin gam ze be shtayin.” Despues de Tel Aviv me plaze Natanya. Parese komo Antalya o Izmir. A Holon, Batyam, Rishon, Hertzeliya, Haifa, Akko i Naariya me plaze irme i kaminar. No ay de dizir Yerushalayim, es otro savor. Tiene un aver muy otantiko. Los Kristiyanos, Muzulmanos i los Djudyos biven uno aryento del otro. Los lugares turistikos, Tiberia, Yam a Melah, Masada ets son sivdades muy enteresantes. La gastronomiya es muy komplikada. En les tierras de Israel ay djente del mundo entero. Por esto puedesh topar todo modo de komida. Si vinimos al sujeto de la eskriturya ke es los dulses del mundo, esta vez vos va kontar los dulses ke komi en Israel. Kada vez ke me iva para kaminar me iva a los paryentes i komo me asentava trayiyan a la mezika Uga ke es komo kek i Mits ke es komo limonata o diferentes aguas de frutas. A todo modo de pasta i kek dizen Uga. El mas ke se save es Rugelach. Komo vos dishe, komo biven personas de munchas kulturas se topa todo modo de dulsuryas. Mas muncho tomaron la Kultura de los Arabos. Los dulses son Baklava, Kadayıf, Kunefe i Mutabbak. Mutabbak es una masa ke se inche kon diferentes frutas komo mansana i frutas sekas komo muez i almendra i despues se friye. Puedemos dizir kada mued tiene diferentes dulsuryas ke se kome. Por egzempiyo, Shavuot, dulsuryas de leche komo mallebi, en Purim biskochos, orejas de Aman, en Pesah kekes ke se apareja kon arina de matsa o dulsuryas ke se azen kon frutas, en Roshashana dulsuryas ke se aze kon miel, komo Strudel, en Hanuka Sufganiyot. Porke ay regla de Kasherut se prefera aparejar dulsuryas ke son Parve. 2 dulsuryas ke komi en Israel no me olvido. El uno es salyendo de la mar en Batyam aviya un Turkano ke vendiya mallebi ensima metiya shurup de vishna, komiyamos yelado yelado, paresiya komo el dulse de Antakya Haytalı, i el otro es Bavariya. Es un dulse komo Mallebi, sutlach o keshkul, me plaziya muncho i komiya kada vez ke topava.
