Ande kedimos?
Ke los bandidos atakaron al ermano de mi nono, lo aharvaron bueno, i lo desharon dezmayado. Unos ke estavan pasando por aya, lo vieron i lo yevaron al ospital. Se kedo diyas i diyas aya porke no se estava akodrando de nada. Ni su nombre. Avagar avagar se vino en si, ampeso a akodrarse ke era turko, ke se yamava Hayim Vitali Boton. Del ospital dieron haber a los turkos. Akel tiempo dainda no aviya el estado turko, era el estado Otomano. De aya les dieron haber a la famiya. Los de aki penaron a kitarle muevo pasaporto o muevos papeles i se lo mandaron, no se por kuala via.
El sinyor Hayim tomo los papeles i al lugar de tornar a su kaza, se fue a Paris. Konosiya muy bien el fransez. Topo un echo i se instalo aya. Se renkontro kon una manseva un poko mas grande de el i se kazaron. Tuvieron una ijika. Un diya en tornando del echo, kedo debasho de un tamvay i se muryo el povereto.
Mi nono Robert despues de la eskola se empyego ande Tiring, una sosyeta de vistimientas muy shik. Aya se konosyeron kon mi nona. El patron era un djudio de la Austria. Kon la gerra se serro Tiring i mi nono ampeso a azer emportasyon de dantelas de Viena. Buen kadar de dantelas le kedo en la mano porke la moda se troko. En muestro ashugar tenemos manteles i savanas brodadas i aplikadas kon estas dantelas presiozas. Agora estan en las validjas porke no tenemos tiempo de enkolarlas i utledarlas. Eskaparon las dantelas, mi nono ampeso a azer emportasyon de tapetes de la Rusya, agora Ukrayna/Odessa. Iva i viniya. Otros merkaderes tanbien le davan paras para ke les merke i para eyos. Ansina sureyo asta... asta la revolusyon. A todos los etranjeros los metyeron en prezo. Torno aki sin paras i sin tapetes. Kuando torno, los merkaderes vinieron a demandarle las paras ke les dieron. Ma ande estavan? En la Rusya. Malgrado esto kon tiempo mi nono les pago todo asta el grosh dalkavo.
No eskapimos. Kon un haver grego, avriyeron una botika de vistimyentas djusto enfrente de Nimet Abla gishesi en Eminönü. Era un magazen muy shik. Trayiyan poplines de seda de la evropa i aziyan kamizas “sur commande” kon inisyales brodadas ensima de la aldikera de la kamiza. Ya estava muy bien, asta… El 6-7 Septiembre. Los salvajes le izieron el magazen sal i siniza. Akeyos topes de poplines evropa las arazgaron en migajas i las arastaron en basho. Kuando trusho unos dos pedasos de estas ropas a kaza, se viya las manchas de sangre ensima. De muevo se adovo todo, ya ampesaron a ganar dos groshes, asta... Les vino papel del governo “istimlak”. Ke es van a derokar akel blok entero para engrandeser la plasa de Eminönü. I akeyo fue un golpe muy grande para mi nono.
Mi nono morava kon mozotros, mi papa le disho: Ya abasta lo ke penates agora azete retirado i repozate. No tienes de menester de lavorar mas.
I esto fue ke grasias a esto, mi nono kerido estava kon mozotros. Mos kontava konsejikas i mos kontava pasajes de la ley.
