Lo ke mantiene el puevlo judio endjuntos no es la rasa, ma los ideales, las leyes, tradisiones i kostumbres. Por esto, kada persona puede ser kandidato para entrar al judaizmo. Kuando el kandidato akumple las kondisiones, puede azerse un miembro de la komunidad. Lo mas importante es tener una intinsion sinsera. En el Tanah eskrive ke los ke se izieron judios kon presion, kontinuaron sus viejas kreensias. Los savios del Talmud no akseptaron estas konversiones sin intinsion sinsera.
Kuando un non‑judio kere azerse judio, le demandan kon un poko de enkantamiento "deke keres azerte Judio?". Se le amostra ke los judios sufrieron de presiones, persekusion i eksterminasion. Si el kandidato afirma ke ya save estas kozas i malgrado esto todo, el insiste a azerse judio, akeya vez puede ser konsiderado. Los ke keren azersen judios solo por kazarsen kon un judio o por una simple razon, no fueron bien vistos ni por los savios del Talmud ni por los rabinos ortodoksos de oy. Estos kandidatos deven de estudiar las tradisiones i las leyes judias, si no, no pueden tener kontribusyones a la komunidad i pueden trayer problemes. Por esto, no se aksepta su konversyon.
De otra parte, por milanyos, munchos ombres i mujeres de diferentes nasiones i rasas entraron al judaizmo i fueron akseptados komo judios sinseros. El kandidato deve pasar por un intensivo proseso de edukasion: ambezarse el ebreo, estudiar la Tora i la istoria judia, i konoser las kostumbres, las leyes i los rituales. El ke nasio judio se ambeza estas kozas naturalmente de su famiya i de su komunidad; ma el ke se konvierte al judaizmo deve estudiarlos en detalyo. Los nombres los mas eskojidos por los ombres son Avram; por las mujeres, Sara i Rut.
Los ombres deven azersen berit milla; los ombres i las mujeres deven pasar por el mikve (el banyo ritual). Si el ombre ya se izo berit milla mas antes, se aze una aplikasion suplementaria: el moel toma una gota de sangre i dizen las bendisiones del Berit‑Milla.
Si una mujer se izo judia duspues de kedarse prenyada, el ke va naser es inkluido a la konversyon i va naser judio. Esta opinion fue sostenida por Rashi i Moses Isserles.
El ke se izo judio deve kontinuar el respekto i las responsabilidades a su madre i padre. En su muerte, mezmo ke no se van a aplikar todas las reglas de dolyo, se deven aplikar unas kuantas komo sinyal de respekto. Es akseptado por los rabinos ke se puede dizir el Kadish por los padres non‑judios. El Kadish es universal i afirma la fe a la buendad de Dio.
Si un bebe de madre non‑judia es adoptado por una famiya judia, el bebe es judio mezmo ke no puede dar su akseptasion porke es chiko. Kuando viene a la edad de bar‑mitsva (13 para ombre, 12 para mujer), puede salir del judaizmo, ma si no lo aze, se keda judio para siempre.
Es prohibido de arebashar el pasado de un konverso. La Tora dize: “El envitado ke mora kon vozotros va ser komo el nasido entre vozotros i lo vash a ver komo uno de vozotros.”
