Oy vos kero kontar un poko sovre el paiz de Georgia i la sivdad Batumi ande mos fuimos. No kero muncho alargar i kon detayles kontar la sivdad porke ya savesh ke en esta pajina ay unos kuantos mezes vos esto kontando las salatas, las supas i los dulses de las sivdades ande kaminimos. Esta vez vos kontare sovre Batumi i despues komo kada vez un poko de la gastronomiya i de los dulses spesyales ke komimos ayi.
El otel Intourist Palace estava en el sentro de la sivdad. Estava serka de todo modo de lugar i podiyamos ir a pye. Enfrente del otel aviya el parko del estado. Aryento de los arvoles al lado del bodre de la mar kaji 7 kilometros. En kaminando entrimos a unas kuantas Iglesias komo Batumi Katolik, Armenyan Gregoryan Apostolic, Ortodoks St.Nicholas. Despues vinimos a la plasa Piazza. En esta plasa enverano mos disheron ke se aze konseres, ay kafes i restorantes. I mozotros mos asentimos para bever un kafe i eskansar.
Al diya tomimos un tur del otel kon giya para ke mos kamine i para ver lugares muevos. Despues del dezayuno, en primero mos yevo a una guerta Botanika. Muy grande i muy enteresante. Mos kontaron ke es la tresera grande guerta botanika del mundo. Kaji mas de 2 oras kedimos ayi. Despues mos yevo al distrito ke se yama Keda. Aki se topa mahsenes i se aziya vinos por la dinastia Rusos. Mos amostraron komo se apareja i despues komo se guadran los vinos. Oras de midi mos trusho a una kaza de vino Adjarian Wine House. Aki komimos espesyales de Georgia i bevimos vino, i mos konto el rituel komo beven el vino ke se yama Tamada.
Despues de komer mos trusho al distrito Gonio ande se topa la muraya Apsaros. Aryento de la muraya aviya un chiko muzeo arkeolojiko i la tomba de St. Mathias. En eskapando el tur del diya, en tornando mos amostro la unika meshkita ke se topa en Batumi, ke se yama Orta Cami. Kaminado vinimos a la plasa Piazza i de aki mos yevo al teatro ke se yama Sevavadze, ke es un teatro nasyonal. La arshitektura estava tipika Rusa. En medyo de la guerta del teatro aviya un estatua de Poseidon. La vista estava muy majestuoza. I ansina eskapimos el tur ke izimos kon la giya. Despues ke mos eskansimos un poko en el otel, a la noche salimos para komer al bodre de la mar ande aviya un restorante komo Bistro i aviya 2 tanyedores Piyano i Saksafon. Komimos kon muncho keyf porke la muzika ke estavan tanyando estava maraviyoza.
Al diya salimos a kaminar i konoser la sivdad. Mos fuimos a la kaye ande se topa la statua Altın Postlu Koç. En el kamino vimos la Katedral Batumi Holy Mothers Virgin’s Nativity i de aki abashimos por el bodre de la mar. Aki aviya 2 statuas muy emportantes por las personas de Georgia Ali & Nino i La kula de Alfabeta. Kuando mos kansimos de kaminar entrimos al otel Radisson Blue. En el tejado teniya un kafe kon muy ermoza vista. Mos asentimos i bevimos kafe en mirando la vist kon una pasta espesyal ke vos eskrivi ariva, Kada.
Viyajar es una Pasion
