En vezes los evenemyentos del pasado vyenen delantre los ojos komo un filmo de kolor. Me akodro, era un mez de Marso bien yelado, mos estavamos aparejando para el kazamiento sivil. Mi novyo aviya eskapado el askerlik i yo la eskola. Despues ampesi a lavorar komo sekreter de un Direktr de Banka, posto ke me plazyo muncho. Todos los eskritos i las operasiones se eskriviyan en Fransez, no aviya otra lingua ke se empleyava en la Banka de Salonik.
Unos kuantos diyas antes del kazamiento, mi padre kayo hazino kon una konjestion pulmonar kon kayentura bien alta. Doktores van i vinyendo… En este tyempo la kura prensipal era Penisilin, algujas ke se aziyan kada 3 oras de diya i de noche, no durmir por no pasar la ora.
El diya del kazamiento gana o no gana mos vistimos, bluza i chapeyo roz, kon el tayor. El tyempo se enderecho, el Salon era de sinko puntos de kaza, la djente ampeso a vinir, amigos, paryentes i siguramente el Direktor de la Banka, ke iva ser mi shaet, siguramente los novyos ke eran mi novyo i yo.
Agora kale ke vos konte un punto enteresante prensipal.
Aviyamos arogado a mi tia Rejin de estar en kaza por kudyar a mi padre, ma kuando se fue a kaza, medya ora despues, vido la kama vaziya, lo bushko en la kaza entera dingunos, se yamo los vizinos salieron a bushkida en las kayes, mi tia se ezmayo, kolonyas, aguas, estruisyon del mundo. Por aki todos los envitados se asentaron, tambien siguro los novyos… La puerta del salon se avre kon bruyido, i mi padre bien vistido, i bien arapado entra en dizyendo, “Yo tengo una sola ija, es posivle ke no va vinir en este diya de alegriya?” i se asento.
El kazamiento se kumplyo i tornimos a kaza. La tia Rejin medya ezmayada i murmureyando “komo me se fuyo? “Todos se kalmaron, i todos los garsones de Lebon, la Patiseria famoza de akel tyempo, izyeron el servis i todo se eskapo kon alegriya, aparte la tia Rejina ke kontinuo a murmurear, “komo me se fuyo de mi lado…”
Anyos pasan i estos rekuerdos kedaron en mi korason komo un filmo de kolor ke se ve de vez en kuando.
