El 8 marso fyestimos el dia de las mujeres en el mundo entero.
Jeneralmente ay una idea ke si sos mujer, azes todo! Reelmente es verdad.
Si semos mujeres, estamos azyendo todo. Estamos engrandesyendo a las kriyaturas, mirando la kaza en todos los puntos de vista, mos estamos indo al echo, estamos dirijando i menajando a los maridos, i munchas otras kozas.
Komo esta el ijo en la eskola, tyene problem kon los amigos u la profesora, esta hazino, kualo gizare para la noche? I estas kestyones pueden alargarsen el karar ke kero.
Ser mujer es un talento de organizasyon inkreivle. La kapachitad de pueder ver i azer, de azer todos los echos endjuntos. Esto no tyene un raporto kon la kultura de la persona. Esto es una partikolaridad ke vyene de aryento del korason de kuando nasimos. I las mujeres kazalinas son kapaches de azer todo.
Todas las mujeres son iguales.
Yo penso ke si no ay mujer, no ay kaza, no ay la kayentor de una famiya. La mujer es todo para detener el ekilibro de la famiya, fyestar las fyestas, aparejar las komidas savrozas i aunar a la famiya.
Entonses; el 1 de avril ya es PESAH, ke es una de las mas grandes fyestas, i ke kontinua una semana. Es el simbolo de la independensya, i de la salvasyon de la nasyon israeli.
La liberasyon del esklavaje de Misrayim.
Pesah es la mas grande fyesta porke eya trusho la idea de la libertad, de la independensya a todas las kulturas del mundo entero.
Pesah metyo en medyo komo una valor sosyal el derecho de bivir independente de la persona, antes 3000 anyos de la revolusyon franseza, por la primera vez. Eyos tomaron fuersa de este evenemento, para no pedrersen i machukarsen; malgrado todas las matansinas i egzilos ke les vino a la kavesa.
Eyos kedaron en pyes, grasyas a la konfiensa ke tuvyeron en Dyo.
La seremoniya ke se aze esta noche mos akodra las valores universales komo la independensya i el kavod, la dinyita de la umanidad, ande i komo nasyeron estas valores i akodrarmos ke no mos puedemos arrepintirmos de estas valores.
La seremoniya del Seder es mostrar a los mansevos, el mesaje de kontinuar muestras tradisyones komo esta fyesta, i responder a todo modo de kestyones de los chikos.
Para pueder bendizir la fyesta, se beve un vazo de vino, ke todos toman un sorvo.
El lavar de las manos, es el simbolo del apuramyento.
La oja del apyo se unta al vinagre, i se kome para akodrarmos de los dias amargos ke pasaron.
Se aze la orasyon de la Matsa, i se kome dos pedasikos.
Despues ke se eskapa de komer, kon el treser vazo de vino pasamos a las orasyones de rengrasyamyento.
El guevo duro ke se mete a la meza, es el simbolo del Korban. Maror es una planta amarga, para akodrar las sufriensas de los djudyos.
El Haroset es el simbolo, de la nostaljiya a la independensya.
El vinagre es el simbolo de las lagrimas ke vazyaron en Misrayim.
Asigun la Hagada; Pesah se fyesta en echando tino a sinko elementos.
Korban, Matsa, Maror, bever 4 vazos de Vino, i meldar la Agada.
Estas komidas savrozas, son aparejadas por las “MUJERES” kapaches i muy reushidas ...
PESAH alegre, kon todos djustos, kon sanedad, pas en el mundo entero, felisidad en todas las kazas i ke seyga fasil para todas las Mujeres.
Pujados i non aminguados!
