PE-RE-JA

AVIYA DOS ERMOZAS VYEJAS

LA UNA ERA VIZINA, I LA OTRA MI TANTI REDJA

LES PLAZIYA MUNCHO KOMER LENTEJAS, KON MOLEJAS

MORAVAN EN ŞIŞANE EN UNA KALEJA

AVIYA UNA GUERTA ANDE SEMBRAVAN NARANDJA

KUANDO KERIYAN KOMER, KORTAVAN KON LA NAVAJA

I EL MARIDO DE REDJA VENDIYA ERMOZAS MOLEJAS

UN DIA KIJERON KOMER EN LA GUERTA, TANT REDJA

KON LA VIZINA KE ERA I EYA VYEJA

IZYERON UN PRANSO, KOMO KONSEJA

AVIYA EN LA MEZA SALATA, ARROZ, MOLEJAS I LENTEJAS

I SE ASENTARON DEBASHO DEL SOL, REDJA KON LA OTRA VYEJA

EN KOMYENDO LE KAYO AL CHINI DE REDJA

UNA TEJA DEL TEJADO, I EL KALDO DE LA LENTEJA LE SALTO A LA SEJA

PRESTO KITO UNA RIDA I LO ALIMPYO KON KOLONYA PE-RE-JA

TENIYAN UNA IJA KE ERA FUERTE I MUY FITIJA

AL LADO DE LA MEZA AVIYA UNA ANTIKA TINAJA

EN DJUGANDO, ESTAVA KORYENDO LA IJA

TANTO KORYO, TANTO KORYO SE KAYO I LA ROMPYO LA TINAJA

ERA KEDADO DEL PADRE UNA MEMORYA PARA REDJA

ESTO KE VIDO REDJA, SE DEZMAYO ENRIVA DE LA OTRA VYEJA

PARA KE VENGA EN SI, LE IZYERON GOLER A LA NARIZ KOLONYA PE-RE-JA

KUANDO SE DEZMAYO ENRIVA DE LA OTRA VYEJA

LA DEZMAZALADA DE REDJA, UNA ALFINETE IZO RAYAR LA OREJA

I PRESTO LO ALIMPYARON KON KUALO? KON LA KOLONYA PE-RE-JA

I PASO UN POKO DE TYEMPO DE LA KONSEJA

I SE ALEVANTARON PARA IR A KAZA, REDJA KON LA VIZINA VYEJA

KE NO SE LE ABOLTE EL PYE DE REDJA?

SE LE  ABUFO EL DIZ, MA PARA KALMARLA SE ESKAPO LA KOLONYA PE-RE-JA!

I ESTE MODO VİNİMOS A LA FIN DE LA KONSEJA

Pesah alegre, kon sanedad, kon alegriya, i kon pas. Para kada anyo mijorado, pujados i no amungados.

Hag Pesah Sameah.