En pasadas en el kanal ke sigo meldi esta vida i pensi ke los filmos i los livros no se eskriven en vano.
Thomas Brennan, biviya solo en una kaza chika alkilada en Denver. En el anyo 1892 resivyo un telegrafo, en meldando estava tremblando. En el telegrafo eskriviya ke su ermano chiko muryo de una kriza kardiaka i sus tres kreaturas kedaron solos sin padre i sin madre.
Los guerfanos, uno de ocho, otro de sesh, i otro de kuatro anyos.
Thomas teniya trenta i kuatro anyos, biviya solo i teniya una vida byen ordenada. Nunka penso de kazarse i de tener una famiya. Nunka le viniya al tino tomar la responsabilita de tres kriaturas. Ma en el telegrafo estava eskrito la data i la ora ke iva vinir el treno i trayer sus sovrinos.
Todas sus ideas trokaron la ora ke arivo el treno i abasharon al peron estas tres kriaturas, kon sus vistimyentas vyejas i solo una validja en sus manos. Akeya ora su korason palpito, sintyo una kerensya, kon las lagrimas en los ojos koryo los abraso i los trusho a su kaza.
Los primeros diyas fueron byen duros, estos diyas estavan mas duros de las nochadas ke penso i no durmyo para desidar de tomarlos u no. Komo no era auzado munchos diyas kemo las komidas ke estava gizando, mallogro syertas vistimyentas en lavando i lo mas difisil las nochadas largas ke los kriyos yoravan i gritavan ke keriyan sus paryentes. Demanyana en aparejandolos para la eskola, Margaret yorava en peynando sus kaveos ingridos, James no keriya ir a la eskola, Samuel el mas chiko kada demanyana demandava kuando va vinir el padre a tomarlos i esto era lo mas difisil porke Thomas no saviya ke repuesta le va dar.
Una noche lo topo a Samuel durmyendo aryento de un almaryo. Kuando le demando,
“deke estas durmyendo aki”? Samuel le respondyo, "me espanto de aleskuro, aki esto mas seguro.”
De akea noche endelantre fue ovligado de tomarlo a su kama unos kuantos tyempos.
Kada noche les kontava istoryas sovre sus padres, a poko a poko Thomas se ambezo a kual le plaze soledad, a kual le plaze ke lo karesen i a kual ke komida le plaze, se ambezo a aremendar sus vistimyentas, se ambezo a kalmarlos kon pasensya, los durmyo kon kantikas de kuna, los yevo a la eskola, kuando se engrandesyeron los aspero fin demanyana i se preokupo por eyos.
Thomas agora no era solo un tiyo de tres guerfanos, era mas de un padre.
Los anyos pasaron, la chika kon kaveos ingridos Margaret, se izo una profesora perfekta, James meldo jeolojia, se izo jeolog i Samuel, el ke se espantava de aleskuro se eskrivyo a la armada, se izo soldado.
En kada momento Thomas, los observo en silensyo i kon orgulyo, nunka no los desho solos, nunka no aspero nada de eyos, nunka se kazo ma nunka estuvo solo.
Una noche Margaret le tomo la mano en su mano i le disho,“el dia ke pensimos ke muestra vida eskapo, mos tomates i mos dates vida de muevo.”
Akea ora Thomas entendyo ke famiya no es una koza ke se aze kon planos. El no izo plano de kazar, no tuvo dezeo de tener kriaturas ma se izo padre i todo troko en su vida.
