Kada fiesta judia era emportante para los sovrebivientes del Olokosto: las orasiones, las komidas, las tradisiones porke no pudieron selebrarlas durante anyos en los kampos de konsantrasion. Agora keriyan bivir el judaizmo i kompartir el Pesah kon todos sus keridos.
Me akodro ke kuando Pesah se aserkava, la kaza se aziya kompletamente kasher una semana antes del primer Seder. Todos teniyamos doveres. Mi ermano Sammy, mi ermana Esther, mis primas Barbara, Helen, Sheila i yo espandiamos kontraplakas enriva las mezas. Entremientes mi madre i mi tiya estavan alimpyando el orno i el mupak. Todos los panes de la kaza se guadravan. Aziamos paketos todos los platos, pirones, kuchiyos i kupas ke empleyimos durante el anyo entero, kitando en medyo solo akeyos rezervados para Pesah. Kada anyo, ivamos a la likoreria kon el tiyo Morris a merkar vino kasher. Todos ayudavamos a yevar los mobles de la sala a las otras partes de la kaza. Mas de 40 famiyas i amigos ivan a asistir al Seder de la primera i la segunda noche.
Para mi famiya, Pesah era un trezoro. Mezmo una chika fiesta, reprezentava una selebrasion de la vida judia. Mi madre, Ruthie, i mi padre, Manny Gold, endjuntos kon mi tiya Gussie i mi tiyo Morris Rados, sovrebivieron el Olokosto. Bivieron los orores de Auschwitz i empesaron una mueva vida en los Estados Unidos.
Aviya bastantes mezas i siyas. Mi madre i mi tiya aparejavan las komidas de Pesah. Me plaziya ver komo aparejavan el haroset. Gizar i ornear nunka kedava. Por las kreaturas, todas estas aktividades eran muy emosionantes porke tambien sinyifikavan las vakansas. Desde ke eramos muy chikos, Sammy i yo ya saviyamos ke ya vino la primera noche del Seder kuando mos kortavan los kaveyos para Pesah. En tornando a kaza del kuafor, muestra madre siempre mos aparejava un plato espesial: guevos batidos kon sevoya. Ansi empesava Pesah. Muestros padres tomavan muy en seriozo el servisio del Seder; empesavamos a las 7 de la tadre i eskapavamos a medianoche. Mi padre dirijava el servisio, meldando kada palavra en ebreo. Keriya ke las kreaturas agan atansion, por esto, en vezes, les demandava en ke pajina estamos. Muestros Sederes eran muy konosidos en la komunidad, i ser envitado se konsiderava un onor. Muestros padres tambien envitavan miembros de la komunidad. En vezes envitavan muestros profesores, kon la esperansa ke ivamos a tomar mijor notas, o a las vezes al shef de polisia lokal, djuzgadores o politikos. Mi ermano, mi ermana, mis primos i yo mos enkorajavan a yamar diferentes amigos kada noche.
Selebramos Pesah de esta manera durante anyos kon mi famiya. Esto sigiendo lo ke aziya mi padre. Esto dirijando los Sederes las dos noches. Komo ijos de los sovrebivientes del Olokosto, kreo ke es emportante ke muestros ijos i ijas konoskan muestras tradisiones relijiozas.
