“Monicagate”, es un skandalo ke okurro en 1998 en la Kaza Blanka durante la prezidensya de Bill Clinton. Monica Levinsky, nasida en 1973, es de famiya judia en los Estados Unidos. Despues de tomar su lisensia en psikolojia, entro komo stajyera a la Kaza Blanka en Washington entre 1995-1997. Durante este tiempo, eya tuvo una relasion seksual kon el prezidente Clinton. El grande yerro ke izo, fue de kontar esta relasion a una amiga i en 1998 el mundo entero fue informado de este skandalo.
En primero Clinton niego su relasion, ma la fusta de Monica, manchada durante su relasion, fue el provo de su kontakto kon el, i Clinton fue ovligado de admitir su relasion non apropriada kon eya. Monica, umiliada por la “media”, perdio su reputasion i se enserro en su kaza. Entro en una grande depresion i disho ke keria saltar de la ventana i matarse. Despues de un sierto tiempo su dezo era: “Lo ke kero lo mas muncho es un lavoro, un marido, ijos i ke me traten komo una persona normal”.
En 1999, fue invitada del kanal ABC i fue segida por 70 milion de spektatores. Obtuvo 500.000 dolares por su partisipasion en el livro de su biografia i un milion por sus derechos internasionales de la entrevista kon ABC. Profitando de la atension publika dezinyo bolsas kon su nombre. Fue artista en "Monica in Black and White”, parte de una seria America Undercover. Prezento un program en Fox TV, konsejando a las mansevas sovre sus komportamientos kon los ombres. Malorozamente todas las ganansias se estavan indo a los avokatos para su defensia i la atension publika la estava kansando enormamente.
A la fin se desidio de alesharse de la vida publika i se fue a Londra para estudiar Psikolojia Sosial en London School of Economics i obtuvo un master (Master of Science). Izo estudios sosiales para luchar kontra las akuzasyones mediatikos. Su vida tuvo kuatro fazas: eskandalo, muncho bruido, silensio i a la fin renasimiento. Agora eya se define komo aktivista anti-bullying, konta en Ted Talk, The Price of Shame, los problemes de las mujeres viktimas i komo salvarse de la verguensa i salir kon kavesa sana del drama de la vida. Monica oy tiene 52 anyos i tiene una kompanyia de produksyon para la televizion. Kon su enerjia i lavoro vino su sukseso profesional ayudando a kurarse del pasado. Andrew Morton eskrivio su biografia kon el nombre “La istoria de Monica”.
Mozotros los sefaradis tenemos dichas muy savias komo “kuando muncho se eskurese es para amaneser”. Esta fraze es para dar pasensia i esperansa en tiempos de krizas. Monica Levinsky supo komo transformar su vida de shok i verguensa en una vida injenioza yena de aktividades i produksyones.
