Los livros no son lo mas sakro ke DYO embiyo a la umanidad.
Es la intelijensya…
La demokrasiya ke esta dirijando el mundo sivilizado, no egzistiya en los livros sakros.
La egalita de klasas, kitar den medyo el esklavaje, los derechos de las mujeres, el laisizmo, los derechos umanos, la ley universal…
Kalendaryos ke uzamos, las ondas de la radio, los antibiyotikes, los komputadores…
Ningunos de esto todo no vino kon los livros sagrados…
Vinyeron kon la intelijensya…
La koza la mas santa ke el Dyo mos dyo es: La Intelijensya.
El ke te lo dyo es para ke te aproveches.
Ma mirate, mira a tu estado.
Estas medyo ambyerto, medyo arto bivyendo en la tyerra la mas fertil del mundo…
I enriva la kultura la mas kompleta del mundo, estas privado de la teknolojiya, del arte i de la rikeza del konosimyento…
Del modelo de tu kamiza, del kalsado ke yevas en tu pye, de la bordura de tus antojos,... del traktor ke asperas ke te trayga prosperita, asta el molino ke te va dar la arina…
Dinguno de eyos es la invansyon tuya…
Es la ovra de los ke kullanean sus intelijensyas…
Ma, no pudites fabrikar un analjeziko…
Si tyenes dolor toma una pastiya alemana…i arima tu espalda kontra el kayentador de gaz ruso, ya te pasa…
Munchos chikos ke se mueren de no pueder alimentarsen…
El lugar ande la grande partida de los lavorantes se mueren en sus echos…
El lugar ande la grande partida de las mujeres son enkuchiadas…
Sos una persona de un paiz ande munchos mansevos se estan suisidando…
Deke?...
Estas entornado de fuegos i de gerras…
En las kuatro partidas de tu paiz los plomos estan bolando…
Estas en un lago de sangre…
Estan tomando tus ijos de tu mano…
Ma, no entendites dainda…
Ke puedo dizir…
Avre los ojos agora…
Da paso a la intelijensya verdadera ke te dyo el Kreador…
Desha de persigir a estos fanatikos, a esta djente egoista ke solo bushkan el tener poder i la moneda…
Mira de ande vinites despues de mil anyos…
Mira a estos 57 paizes Islamikos…
Ken esta kalmo i orozo?...
Ken de eyos utilizaron sus intelijensyas para azer una koza, para inventar una koza ke syerve a la umanita…
Todos dependen de los otros, esperando sus inventos…
Estas en una situasyon en la ke estas esperando su ayuda…
Pensa i uza tu meoyo…
Dezinyaron a un atashe de presa ke no avla dinguna lingua etranjera, kon un salario de 12.000 dolares!...
Tambyen dezinyaron un interpreto para el atashe de presa por 6.000 dolares…
Tambyen nombraron a la mujer del traduktor komo atashe relijyoza kon un salario de 8.000 dolares.
No puedes topar ni en Afrika, renkontrar este nivel de estupides!...
İlber ORTAYLI
Keridos Lektores,
İlber Ortaylı es un istoryano turko, akademisyen i un eskrivano muy konosido i famozo.
El konose 7 linguas i es el myembro de onor de la organizasyon Türk Tarih Kurumu.
Konose el ruso i el aleman komo su lingua maternal.
En el anyo 1989 se izo profesor.
En el anyo 2005 se izo el direktor del Muzeo del Palasyo de Topkapı.
En 2017 fue onorado kon el Grande Premyo Prezidensyal de Kultura i de Artes. Es una persona muy valutoza.
La eskrita ke eskrivyo me plazyo tanto ke la kije tradusir i partajarla kon vozotros.
Esto mos esta amostrando, la situasyon del paiz ande estamos bivyendo malorozamente.
