Kuando mos desidimos a ir a Sud Amerika, dishimos azeremos el program por 3 paizes: Argentina, Uruguay, Brasil. Oy vos va kontar un poko de Buenos Aires i siguro por los dulses de Argentina. El otel era en la kaye ke es la mas ancha del mundo 9 Jull Av Hotel Brizo. De la kamareta se estava viendo el Obelisk ke se topa en el sentro de esta kaye grande. En esta avenida aviya la Opera Colon. Vos kontare en este sivdad kualo ay de ver i kaminar. Kale azer el tur del Rio Tigre. Es un rio muy enteresante. Ay djente ke biven en el bodre de este rio aryento de las barkas. Komo Amsterdam. En el rio se topa todo modo de kozas. Eskola, merkado, ospital ets. En Buenos Aires el mas emportante distrito ke kale ir i ver es La Boca. Aki es un distrito viejo i muy otantiko. Las kazas, los restoranes, los kafes todo antiguo ke protejaron. Si vos asentash en un kafe o restoran vienen al lado de vozotros i baylan Tango ke es el bayle nasyonal de este paiz. Este distrito es nombrado kon el futbol i Maradona. Los lugares turistikos son la Katedral Metropolitan, Casa Rosada, (en el balkon de esta kaza Evita Peron echava boz al puevlo) Cabildo (Es la fragua de la asamblea vieja) todos estos lugares se topan en la plasa Plazza de Mayo. En kaminando estos lugares la Giya mos diyo enformasyones por Argentina i Buenos Aires. En el paiz biven 250.000 djudyos. Despues de la sigunda gerra Mondial vinyeron munchas personas del la Evropa. Ay Sinagogas diferentes komo Ashkenazi, Sefaradi i Reformista, ay restoranes kasher.
Alvear es una kaye grande i muy shik. Aki ay botikas, kazas, kafes. El kafe Tortoni es muy otantiko i viejo. Para entrar ay una kola larga. En el mundo ay simeteryos ke se konosen i los turistos se van para vijitar i aki ay un simeteryo ke se yama Recoletta. Parese komo un muzeo avyerto. Si keresh ver una demonstrasyon de Tango en la Opera Colon puedesh ver. Los Chiftlikes de kavayos de Argentina son muy nombrados. Un diya kale apartar tiempo para ir a estos Chiftlikes. En kaminando vash a konoser la vida ke biven los Gauchos. (Choban). Komo se save las karnes de Argentina son maraviyozas. En el chiftlik en komyendo karnes asadas modos i modos puedesh ver una demostrasyon de los chobanes. Bayles i muzikas. Las karnes komo vos dishe no vos puedo kontar kale komer para entender. En la Gastronomiya se topa Empanadas. La marka de la Bira es Killes. Aki mas muncho de kafe se beve un chay ke se yama Mate. Mate se beve aryento de una kupa de metal o de Kalavasa i se beve kon pipet. Si vinimos al kavzo de la eskriturya ke es los dulses del mundo, en Argentina en todos los lugares puedesh topar Dulce de Leche. Es un dulse ke se aze kon leche. La leche se koze kon asukar avagar avagar fin ke se aze komo karamel. Este dulse lo meten aryento de las pastas, de los bishkochos o si no se fregan ensima de la revanada de pan i komen.
