Mi nono Simantov Robert Boton era nasido en Hasköy. Eran kuatro ermanos. El mas grande era mi nono. Despues viniyan Mordehay, Efrayim i Hayim. Su padre Moshe Boton era shastre. Diziyan ke su madre Dudu Ida Boton era muy ermoza. Blonda, kon ojos vedres. I sus ijos teniyan ojos vedres. En Hasköy la yamavan “La inglezika de Aynalıkavak”. Eya era nasida Yaesh. Despues ke se kazo moraron tanbien en Hasköy. Asta ke en el fuego famozo se les kemo i la kaza suyas tanbien i kedaron solo kon sus vistidos en la kaye. Kreyo ke era el sigundo fuego. El primer fuego afito en 1883 i el sigundo afito en 1894. Mi nono era nasido en 1887, alora es siguro ke era el sigundo fuego. El deviya de tener 10-11 anyos. Estudio en el Seminaryo de Hasköy. Kon los primos de Paris se letreyavan en solitreo.
El padre de mi nono, Moshe Boton era flakito i moreno. La madre de mi nono era alta, blonda i ojos vedres komo ya vos dishe ariva. Los inyetos la keriyan muncho bien. Un diya mi mama le demando: “Nonika, deke te kazates kon el nono? El es bashitiko, tu sos alta”. La nona le respondyo: “En lo ke eramos mansevos i ke mos konosimos era muy luzyo. Teniya un mustachiko preto delgado, i las alhamoras koloradas”.
Despues del fuego, ke se kedaron en la kaye, un poko tiempo se fueron a morar a Balat, ande un paryente. Aviyan dicho ke les ivan a ayudar kon un montante de paras. Ma no les dieron ni un grosh. Del Dio ke el padre de mi nono era shastre i ampeso a lavorar de muevo. Diziendo shastre no vos imajines ke kuziya kostumes o paltos muevos. Akel tiempo de la provedad, lo mas le trayiyan el palto del padre, ke lo deskuzga, ke lo abolte al roves i ke le kuzga al ijo un palto. Lo aboltavan para ke no se veyga ke estava deskoloreyado.
Un diya, uno trusho de muevo un palto semejante. En lo ke ampeso a deskuzirlo el palto, vido ke aryento las kusturas esta yeno de piyojos. Entremientes ya se aviya piyojado el entero. Ya afitava kavzos semejantes. Despues ya se pasaron a Galata a sus kazas. I de muevo aya ampeso a su ofisyo. Los ijos ya se engrandesyeron i kada uno ampeso a lavorar. Un ermano se izo kimiko, el otro ampeso a azer emportasyon, el otro se izo kontable i kon tiempo se izo el direktor de akeya fabrika, i el mas chiko se izo aventurero. Una noche entro a la eskondidas aryento de un vapor ke se iva a la Amerika porke aviya oyido ke en la Amerika ay oro i todos se estan azyendo rikos. I el se fue aya. Despues de buen karar de tiempo ke ya aviya arekojido muncho oro, los bandidos lo atakaron, lo firieron bueno, le tomaron las paras i los oros i los papeles de identidad i lo desharon en un lugar dezierto. Ya mos se incho el kantoniko, kontinuamos mas despues.
