Keridos i Keridas oy vos va dar una Rechet sin Kolesterol i kon Muncho Plazer. Antes dizian los grandes: "Una riza, un kilo de kostiyas." Si pensamos en el presio de la karne oy en diya, este refrán no es solo un konsejo para la salud, sino una buena idea para kudiar la aldikera. Si riyimos muncho, es komo si komimos ''de baldes''! Ma muestro menester no es solo kon la bolsa, sino kon la satisfaksyon de la alma.
En muestra komunidad, espesialmente en las mezas de Shabat ke no se eskapan kon alegria, la riza es el primer plato. A vezes riyimos tanto ke se mos olvida la savor de las koftikas de prasa o de las borekas. Sera ke una riza puede ser tan nutritiva?
Instruksyon o la Saviduria de la Nona?
La medikeriya moderna dio la razon a muestras nonas munchos anyos despues. Kuando riyimos, la endorfina empesa a baylar i los hormones de stres dizen aki no ay pan para mozos i se van de kaza. Kuando riyimos, 15-20 musklos de la kara empesan a lavorar; es komo un djimnastiko para la kara. Pensandolo bien; al lugar de ir al "gym", es mijor djuntarse kon los amigos i kontar konsejas de antes. Riyir de las aventuras de la famiya es la primera fuente de proteina! Sin kalorias i sin grasa.
La Bendision de la Alegria
La bendision de una meza no se mezura kon la rasyon en el plato, sino kon el echo de las bozes ke se oyen. La riza es la komida "kasher" de la alma. Yo prefero una meza de pan i sal kon muncha riza, a un bankete de rikeza kon kara de vinagre. La kostiya la puedes komer solo, ma la riza es un miraklo ke se multiplika kuando se partaja.
Para Eskapar...
La vida a vezes no tiene savor de kostiya. A vezes es dura, a vezes es flaka. Ma no se olviden: kuando topamos una razon para sonreir, la savor se keda en la boka mas muncho ke la mas savroza komida.
Esta semana, azete un bien a ti mizmo. Desha la dieta i el espanto de los riskos de la vida de lado. Yama a tus buenos amigos, konta una vez mas akeyas shakas vyejas. Porke la instruksyon puede dizir lo ke kere, ma muestro korason save la verdad: El mijor banketo es la riza ke sale de la alma.
La riza ke no mos manke de la vida. Kedavos kon alegriya i kon esperansa!
