Una amiga mia muy kerida tiene un yerno ke es avokato internasyonal. Mos kontava kavzos muy interesantes. Uno de eyos era sovre un payiz ke importava simiente de tomat i demando a otro payiz deke el produkto no kresía en su tierra. Muestro avokato defendía el payiz ke aviya dado la simiente i dizía: “En estos dos payizes el sol no viene del mizmo angulo. Las tierras no tienen los mizmos minerales. Para obtener rendimento es menester de egzaminar muy bien estos kriterios. I klaro, dizyendo ke en kada tierra no kresen todas las flores, gano el kavzo kon fasilidad.
Mizmo mozotros, kuando merkamos una flor para muestra kaza, azemos atansiyon o las kondisyones. Las flores ke merkamos por el balkon o para el salon no son las mizmas. Mos enformamos kuanta agua devemos dar.
La tierra i la flor son un arte delikado. Nesesita konosensyas korektas.
Ansi tambien en muestro developamyento, u en el de muestros ijos, uno de los puntos mas importantes es ver si muestra personalidad i la jeografiya onde mos topamos tienen las kondisyones nesesarias para ser lo ke keremos ser. Si muestros talentos son bastantes i las kondisyones del lavoro son apropyadas, el sukseso no va tadrar a vinir.
Si trokamos la kestion de otra manera puedemos topar otro sentimyento. Si no puedes enfloreser en una tierra bushka otra tierra. Trokar de tierra demanda grande koraje, grande pasensya. Ir no es una fuida, es una bushkada. Insistir no siempre es lo korekto. Una insistensia sin baza puede forsar las kondisyones. Lo ke se aze solo por insistir kansa a la persona i no la yeva al lugar djusto. En este punto, a vezes es importante soltar, pensar ke el universo te detuvo, i tomar una pauza para akumular la enerjía nesesaria para kontinuar. Tomar una pauza no es renunsiar. Tomar una pauza es ganar fuersa. Esto tambien es una grande ganansia.
Agora es tiempo de enfloreser de aerear la tierra, i tomar luz del sielo. No es tiempo de estar sin lavoro i ser haragan. El mundo esta koryendo vos aguro fuersa para pueder kreser i engrandeser.
