Kuando Spielberg era chiko, biviyan en California. Los Spielberges eran la sola famiya judia de la maalle. ‘’Siempre fui konsiente ke era diferente de los otros", se esta akodrando Spielberg. "En la eskola, me aharvavan, me davan puntas de pye. Me korriya sangre de la nariz. Era orivle". En la eskola, se burlavan de el. Aziyan komentarios antisemites.
Durante anyos, Spielberg guadro su identidad. Asta ke entendyo una koza: su diferensia era su fuersa. En los anyos 70 i 80, empeso a trokar el cinema: Jaws, E.T, el Extra Terrestrial, Jurassic Park. Kada filmo se konvertio a un fenomeno mondial.
A los 46 anyos, Spielberg dio un paso korajozo en su kamino judio. El momento el mas fuerte vino en 1993 kon el filmo La Lista de Schindler. Este filmo no era entretenimiento. Era memoria judia. Era istoria. Duspues ke el filmo fue amostrado en los sinemas, miles de sovrebivientes empesaron a kontar sus istoryas personales a Spielberg. Spielberg fondo la Fondasion USC Shoah en California para rejistrar i prezervar estos testimonios. Spielberg entendio ke el sukseso sin identidad no tiene dinguna sinyifikasyon. Kreo tambien un archivo de filmos en la Universidad Ebrea kon miles de oras de entrevistas en video kon sovrebivientes, yamado Projekto Testimonial del Olokosto.
Spielberg no kijo depender en los grandes estudios. En 1994, fondo DreamWorks Pictures endjuntos kon Jeffrey Katzenberg i David Geffen. Un muevo estudio. Libre. Ambisiozo. Kompetitivo. Munchos sospecharon de el. Ma DreamWorks produizo suksesos mondiales i demostro ke un estudio independente puede kompetir kon los djigantes de Hollywood. A Spielberg, lo yamavan "La kreatura judia". Anyos duspues, kreo uno de los estudios el mas poderozo del mundo.
"Kuando nasieron mis ijos, desidi ke se engrandeskan komo judios i resivyeron una edukasion judia". La famiya Spielberg empeso a selebrar todas las fiestas judias. Selebraron el bar i bat mitzva de sus ijos. Spielberg los engrandesyo kon amor por Israel i una fuerte koneksion kon sus raizes judias.
Al lugar de guadrar su judaizmo, Spielberg prefero uzar su boz para kontar istorias ke onoran la memoria i la dinyidad de su puevlo. Ma detras de todo esto, ay una kreatura judia ke nunka se averguenso de ken era. I konstruyo su propio imperio narativo. Porke kuando un judio transforma la dolor a un buto... la istoria troka.
La lision la mas valoroza ke mos ambezamos de Spielberg es komo empleyo las difikultades i sus espantos para krear senso i topar su propio kamino en la vida. Utilizo esta enerjiya para elevar la boz, komo judio. La utilizo para transmeter el talento el mas presiozo ke poseda: su identidad judia.
