Esta semana, fyestimos PURIM en todas las keilas, las organizasyones djudiyas kon grande entuzyasmo, i las kriyaturas kon grande egzaltasyon.
En la istorya de Purim; AMAN es la persona negra i maldicha ke supo travar la atansyon del imperador Ahasverosh, ensima de los djudyos, para eliminarlos del mundo.
El vizir Aman, era una persona muy negra i le plaziya vazyar sangre. Kuando empeso a enteresarse en los djudyos se apersivyo ke eyos kreen al Dyo Poderoso, una fuersa ke no se ve, i tyenen unas tradisyones diferentes. Son reushidos en todos los espasyos i rikos. Esto no le plazyo a Aman, i se desido de despareserlos del mundo.
El buto suyo era de menospresyar al djudyo, para ke su fuersa ekonomika pase al rey.
Antes siglos del evenemento de Purim, si miramos a la Espanya, i aki vemos la mizma koza, komo ke los djudyos son viktimas del mizmo komporto de punto de vista konfiensa.
Akel tyempo en la Espanya, aviya un periodo de los Katolikos muy ferventes.
Ma el djudyo era diferente. El era muy fuerte, de punto de vista kultura i sosyal. No aviya asimilasyon del todo. Ma malorozamente, el destino del djudyo era el mizmo. Los aviyan ovligados a trokar sus relijyones, i a los ke no akseptaron los kemaron. Esto sureyo un siglo, i kuando no salyeron abash; en 1492 los egzilaron.
En 1930 en la Almanya, se enkontraron kon el mizmo evenemento.
En la istorya, en Misrayim; el djudyo no rezistyo, i a la fin lo izyeron lavorar komo esklavo. En Shushan yene no rezistyo, grasyas a la reyna Ester; ke era alliada de los djudyos, se salvaron de murirsen.
En la Espanya de muevo no rezistyeron, i unos kuantos trokaron sus relijyones. I a la fin en la Almanya; malgrado Hitler, no se imajinaron de lo ke puede afitar, i munchos se muryeron en el Olokosto.
I en Purim, enkontramos las mizmas enkyetudes.
La Megila Ester mos ambeza ke las difikultades de la vida ke enkontramos, son un egzamen para arivar a lo mas mijor, ke los detenimyentos son okazyones para developarmos.
I esto todo vyene de la mano del Dyo ke no vemos, i ke mos gia el destino.
Las Mitsvas de Purim ampesan kon Taanit Ester, ke se aze el 13 del mez de Adar. Es el rekuerdo de la data, ke Aman aviya desidado de eliminar a todos los djudyos.
Keriyat Megila, es la mitsva ke todos kale ke melden en el dia de Purim: La Megila Ester.
El miraklo de Purim se realizo, entre las envitasyones i pransos. Por esta kavza Purim es una fyesta kuando todos deven de dar una seuda.
Mishloah Manot. Todos, en dia de Purim kale ke agan regalo dos komidas kayentes i bevyenda a lo manko a una persona.
Matanot Laevyonim.
Komo Mishloah Manot; i esta mitsva kale ke se aga en dia de Purim. Distribuir moneda a los menesterozos, a lo manko a dos personas en este dia mirakulozo. Azer orozos a los menesterozos sin averguensarlos.
La konkluzyon es ke kale kreer en los miraklos.
Kuando kreemos a muestra fuersa i a lo ke puedemos azer, kuando tenemos konfiensa a mozos mizmo, i kuando mos konosemos, muestra vida se inche de los miraklos.
La vida es yena de sekretos. No puedemos saver de ande va vinir muestra salvasyon.
Si la persona kere veramente una koza, si tyene una konfiensa grande en esto; estamos vyendo ke esto se esta realizando.
Kale ser pozitivos, porke tener inyervos, enemistad, aborresimyento, u amistad, kerensya, entuzyasmo u kalmo; todo mos toka en primero a mozotros, i mos influensa en bueno u en malo.
Perdonar al den frente, es akseptar las personas asegun son. Deshar lo pasado, es avrir lugar en muestra vida, a la kerensya i a los miraklos.
La vida es un miraklo, ma los miraklos son los ke estan guadrados aryento de muestros korasones.
