En el tur ke izimos a Sud Amerika, mos fuimos a los paizes Argentina, Brasil i Uruguay. En Urugay vijitimos la sivdad Colonia del Sacramento, en Argentina mos fuimos a Buenos Aires en Brasil a Sao Paolo i Rio De Janerio. Mas de estas sivdades mos fuimos en la frontyera de Argentina i Brasil ke se topa la maraviyoza natura el Iguazu. Rio estava muy enteresante, la rikeza kon la mizerya estavan lado kon lado. Por egzempiyo en el Otel de Sheraton ke es de 5 estreyas aviya un prove ke se astava echando delantre de la puerta. Vimos kazas komo villas, atras de esta kaleja aviya kazas komo barakas. La una parte de la sivdad estava muy shik i rika, la otra parte se estava viendo la mizerya. Mozotros mos kedimos enfrente de la plaj de Copacabana en un otel de 5 estreyas. La vista estava komo una foto panoramika. El Gia mos yevo a los lugares turistikos de Rio. A la Montanya Corcovado ande se topa el monumento ke se yama Salvador Jesus. A este montanya se suve kon Treno. Despues mos yevo el Gia a La Montanya ke se yama Sugar Loaf ande suvimos kon Teleferik. Pasimos de la kaleja ande se aze el Karnaval de Rio. Esta kaleja es 850 Mt i las eskolas de Samba azen la manifestasyon, baylando i kon la muzika de Samba. Este pasaje dura kaji 70 minutos para kada una eskola. Despues del tur, el Gia mos desho liberos. Mozotros kon los amigos salimos a kaminar la sivdad. En primero mos fuimos a las eskaleras de kolores i kolores ke se yaman Escadaria Selaron, una vista muy sempatika. Antes de vinir a esta sivdad, bushki ande se topa la Sinagoga de Rio tambiyen si ay un Jewish Center. El adreso en la mano, empesimos a bushkar; ya topi La Sinagoga Kehillat Yaacov. El Adreso Rua Capeldo Alvares de Silva15 RJ. Mos gustimos muncho de vijitar este Sinagoga. Travimos fotos tomimos enformasyones de los enteresadores.
Despues tornimos al otel mos vistimos los mayos i mos fuimos a la plaj. Las plajes de Rio son muy nomradas. Copacabana i Ipanema tienen muy largas oriyas de mar. Vimos djente ke estavan djugando voleybol, ombres i mujeres. Dishimos ensima de la arena si estan djugando perfekto no ay ke dizir ensima de las yervas ke djugan komo los djambazes los futboldjus.
Sigundo diya vino al otel 3 Jeep’es para yevarmos al Safari en la shara ke se yama Tijuca. Pasimos un diya muy eglendjeli. A la noche mos yevaron a un show de Samba. Era komo un teatro de Kabare; se yamava Ginga Tropikal Samba. En estos doz diyas mos fuimos a 2 diferentes restorantes. El uno era de Karne el otro de Peshkado. Si empeso a kontar estos restorantes no abasta una pajina.
Si vinimos al kavzo de la eskriturya despues de komer moz diyeron dulsuryas i frutas. Aviya bufes de dulsuryas i frutas Tropikales de modos i maneras de pastas, kekes ets. En la meza aviya Quindim, Bolo de Rolo, Canjica, Despacido, Kokada i Brigadeiro ke es el otro nombre Tugay. En los kafes, al lado de kafe estavan trayendo en la meza aviya tambiyen en las patiserias vimos este dulse.
