Kuando me konosí kon mi marido, el era un elevo de arkitektura. Azíamos sus proyektos endjuntos. Dizyendo endjuntos es ke le ayudava a aguzar los kalemes, azía kafe en las noches ke se alargavan asta la demanyana, ma savía kada paso del proyekto.
Mi marido kada noche revizava su proyekto de punta a piye, bushkando el mas chiko eror u defekto, aziendo todo lo posivle para ke sea perfekto. Kuando se anonsavan los rezultados, los profesores siempre le kortavan puntos por un chiko detaylo, i el se keshava “Komo no lo vide?” Los anyos pasaron i izimos munchos proyektos endjuntos. Siempre fuimos metikulozos.
Ma mozotros, los umanos, no semos proyektos. Los proyektos empesan, se pueden kedar en la meatad, i kuando viene el momento, se eskapan. Los ombres i mujeres, en kamino, son kriaturas ke pensan; ay diyas ke no pueden pensar klaro, sienten, i a vezes no pueden sentir. Esto es lo ke mos aze umanos.
Tenemos un lavoro; el lavoro es un proyekto, ma es solo una parte de muestra vida. Tenemos doveres, ma ansi komo no tenemos derecho de entrar en el dover del otro, tambien es sano ke no se mesklen en lo muestro. El ombre no bive sigun un program planifikado, ma sigun su propio ritmo. A vezes mas presto, a vezes mas avagar; a vezes kon emosyon, a vezes kon kalmo.
El ombre no es una skultura sin terminar. Siempre tiene kantones demasiados i faltas. Kuando keremos “kompletar” muestra propia eskultura i limar una parte, puede ser ke la mano no puede azer lo ke kere, kreamos otro defekto. Este proseso no tiene fin, porke no semos una ovra de arte ke espera ser terminada; semos umanos.
Muestras faltas, en vezes paresen una karga, mos dan la oportunidad de kreer muestra mundo i de ambezar. Desde este punto de vista puedemos dizir: “Ke bueno ke tenemos faltas,” i asta darles grasias. Kada falta es tambien un kampo de potensial. El echo de no ser nunka “kompletos” puede pareser pezgado.
En kada esforso por kompletar una falta, eskojemos un kamino diferente. En este punto tengo de avlar del arte de Kintsugi: las rajas no se eskonden; al kontrario, se markan kon oro i azen el objeto mas uniko. La boz ke kere dizir ke semos buenos kon faltas, i las aksepto kon kalmo. I ansina tambien tengo mi valor. El perfekto kon la falta no son enemigos. Pueden topar un kamino de akordo. Bivir kon la idea de reglar todo u de dezazer todo kansa la alma.
Mete tu esforso ma no te maltrates, uza tu potansiyel ma no te kanses kon las eksperiensas de otros.
En el mundo ande estas bivyendo, bive kon tu pas interna porke tu no sos un proyekto ke aspera una nota alta de sus “profesores”.
