Kuando salimos kon Cruisero para los Caribbes, en primero vinimos a Miami porke los Cruiseros se estavan alevantando del porto Fort Lauderdale. En primero mos fuimos al otel, deshimos las validjas, i salimos a kaminar i a konoser a Miami. 2 noches i 3 diyas teniyamos tiempo para kaminar. Izimos el program i empesimos a kaminar. Mos fuimos al Boulevard de Ocean Drive, el sentro de los Kubanos, Little Havana, la parte ande se alevantan los Cruseros para Caribbes, Fort Lauderdale, la kaye ke es serrada al trafiko, Lincoln Road. Si keresh puedesh azer un tur kon vaporiko komo Hop on Hop Off; de la parte de la mar puedesh ver la sivdad Miami i las kazas de los Artistos, ke tienen en el bodre de la mar. Unas kuantas vezes mos fuimos a los Estados Unidos, por egzempio, a New York, a Las Vegas, a San Francisco, a Los Angeles i San Diego. Miami estava muy diferente de los otros sivdades. Es una sivdad Amerikana ma mas muncho se avla en Espanyol, porke tiene frontyera kon Meksiko, vienen munchas personas aki para lavorar i bivir. La vida muy es rika, las djentes kon las arabas grandes i markas buenas, botikas ke se konose kon los markas, las kazas komo villas o sino komo villa al bodre de mar. Kon estos ya se ve ke es una sivdad rika. Kuando estavamos en Miami, los lugares ke eskrivi ariva kaminimos. Ocean Drive es un Bulvar muy ermozo. De una parte ay la mar, de la otra parte oteles restorantes i botikas. La kaye es yena de Palmyes. Lincon Road es serrado al trafiko; ay botikas, restorantes i kafes. Kuando mos fuimos a Little Havana di ke vinimos a Cuba. La vista i las kolores de las kazas i botikas, vimos espesyalmente botikas de Rom i Puro. La parte de Fort Laurdale es un poko leshos del sentro; kuando vos estash aserkando por aki de enfrente ya se estavan viendo los Cruseros.
La Gastronomiya kedo sovre la influensya de Meksiko, Cuba i de Sud Amerika. Por egzempyo puedesh topar Tacos, Quesadillas, Burritos ets. Puedesh topar peshkados, produktos de mar, komo Karides i, Stone Crab (cangrejo de piedra en Espanyol), es un yengeç ke se topa en Miami i a la djente les plaze komer este produkto de mar kon vino. Cuban sandvich, es un sandvich ke trusheron los Cubanos a Miami. Aki komen la djente kon muncha savor. Mango se kullaneya en la gastronomiya de Miami en munchas kozas. En azyendo saladas, o sino dulses es un fruta ke preferan en el mupak.
Si vinimos al sujeto de la eskriturya ke es los dulses ke komimos en viyajando, en Miami unas kuantas vezes mos asentimos en las patiserias. Vide en la vitrina Cheesecake, Gato kon Karota, Brownie, Turtas i Gatos ke se aparejan kon Frutas, Pastas kon kremas i Magnolya. Este dulse es spesyal de aki. De verdad ke es savrozo. Es komo sutlach kon biskuis molinados aryento, i fruta o Frangula o Banana.
