Ya vos aviya kontado ke moravamos en Galata/Şişhane. El doredor entero, komo Yüksekkaldırım, Kuledibi, Tünel, detras de la eskola Bene Berit, todo era yeno de djudios. Los moradores i los esnafes eran todos djudios. De sorte ke las fiestas se fiestavan muy bien. Mizmo el aver goliya de fiesta.
En muestro apartamento biviya solo una famiya levantena, los Milovich. El resto eran djudios. Teniyamos un portero Rıfat kon su mujer Zekiye. Eran muy buena djente, onestos. Todos deshavan las yaves de sus kazas ande eyos. La puerta de la kaza era de fierro. Las noches Rıfat efendi serrava la puerta kon yave i metiya un fierro muy godro, para ke nunka se pueda avrir. Las noches si viniyamos un poko tadre, sonavamos i el povereto se alevantava de la kama kon pijama i avriya la puerta. No aviya komo agora un boton de soneri para kada famiya, ni boton otomatik para avrir la puerta.
Vineremos a la fiesta alegre, Purim. Purim es una fiesta de dulsuryas. Zekiye hanım tomava una tavla (tifsin) grande. Metiya un tapon brodado i enkolado ensima. Despues metiya diferentes dulsuryas, mavlachas, masapan, chikolatas, joles de diferentes kolores, frutas asukareyadas, biskochos, orejas de Aman, Strudel, marunchinos, dulse de kastanyas i munchas kozas ke no me akodro mas. Zekiye hanım suviya kon la tavla asta ariva i ampesava a sonar a las puertas dizyendo “Purim alegre”. Mi mama avriya la puerta, tomava una kozika de la tavla, mi papa viniya i les deshava un bahshish bueno. I Zekiye hanım kontinuava ansina en kada piso en kada puerta.
Esto no era siguro solo por paras, era de amistad. I mozotros, los moradores les aziyamos la kontra en sus fiestas. Kada morador aparejava una noche de iftar en Ramazan. I los envitavan a sus kazas.
Kero komparar kon agora. Desparte ke no tenemos vizinos judios, no savemos ken mora ariva o abasho.
