Fin agora ya sintimos munchos modeles de terapia seya muzika terapiya, seya hipnoterapiya, arte terapiya, terapiya de konsejas, … i munchos mas. Agora el trend muevo es, los psikiatres estan dando una resefta de kuras i una lista de livros personalizados. Romansos, poemas, eksperimentos, konsejas… en vezes antes de eskrivir antidepresanes estan rekomendando livros.
En un artikolo de “Le Figaro”, estava eskrivyendo sovre una mujer de 32 anyos, ke en 2024 paso un aksidente terivle de trafiko. Fue ovligada de tomar fiziko-terapiya kaji 9 mezes. Su doktor allado de su resefta le diyo una lista de livros i la ovligo a meldar kada diya mas o menos 10 minutos. No se imajino. En el empesijo no se estava apersivyendo ke le estava vinyendo bueno. Le paresyo ke es una shakayika del doktor. Ma den diya en diya en el kamino suyo, meldar i topar otros karakteres ke pasan de un kamino komao el suyo, le vino bueno. Se sintyo mas fuerte, mas pasensyoza. Se konsidero ke no es la unika persona ke tyene dolores, o ke pasa de tiempos difisiles. Los doktores dizen ke los romansos son un baston invisible.
Mizmo en los Reynados Unidos, el servisyo de salud (NHS)
esta azyendo miembros de libreria sin paga a los hazinos. Les estan ofresiendo listas de livros de parte de los espesyalistos. I kaji 3 milyones de Britanikos estan en este sistem. La eskrivana Franseza R. Detambel mos dize, los livros puedeser no son unos miraklos ma azen un efekto de palanka. Porke a los lektores les estan akodrando en el kamino de azersen buenos, los benefisyos no se toma solo de los medikamentos. Es un kamino muy umano i enteresado kon psikolojika.
Keridos lektores, mi opinion es, las terapiyas komo estas, son avrir una ventana aryento la vida real i aleshar de la media sosyal, ke no mos viene muy bueno. Porke la media sosyal, komo Facebook, instagram… mos amostra solo la djente ke estan muy orozos, muy buenos de situasyon i syempre se estan riyendo en los lugares mas famozos. Terapiya de meldar a mi me parese ke es komo terapiya de grupos. En estas terapiyas kada uno konta su istorya i el denfrente topa en estas istorias un pedaso de si mizmo. I los livros tienen la mizma fonksiyon. No es solo tu, ke estas hazina. Ay miles i miles de istoryas ke pasaron del mizmo kamino tuyo i parvinyeron.
