La semana pasada meldi un artikolo en el Şalom, ke eskrivio muestro kerido amigo, Metin Delevi sovre el libelo de Damascus.
Este libelo afito munchos munchos anyos antes. Me demandi: Eskapo? Kreyo ke no.
Me akodri una shena ke esta dainda biva delantre de mis ojos.
Kuando era yo chika i tanbien mansevika (inkreyivle) mos ivamos a la kampanya a Yeşilköy. Akel tiempo Yeşilköy era verdadmente un köy/kazal. Agora se izo una sivdad moderna. No aviya kazas altas. Lo mas eran kazas de dos etajes. Las grandes kazas eran kyoshkes de tavla. I akeyas teniyan dos etajes i medyo. Komo estas kazas de akel tiempo teniyan kates kon tavanes altos, paresiyan mas grandes, ma no. Kurto, komo la arkitektura, i la vida era muy simple. No aviya otomobiles, otobuses en las kayes. La djeografiya no es komo las de las izlas. Las kalejas de las izlas son todas yokushes. Yeşilköy es un lugar muy derecho. Todos teniyan bisikletas. Por esto las kriyaturas djugavan en las kayes sin espanto.
Otruna karakteristika era ke en la mizma kaleja moravan ermenis, gregos, bulgaros, judios i muzulmanos. No mos rendiyamos kuento, i no mos enteresava ke el uno es grego o el otro es muzulmano o bulgaro. Yorguli, Kirkor, Marikula, Sofiya, Fani, Mustafa, Sara, Onnik, Kirkor, Burhan Vaso, todos djugavamos endjuntos sin sintir diferensya.
Un diya afito una koza ke mozotros las kriyaturas no mos rendimos kuento, ma a mi mama le embaraso muncho i tambien se inyervo.
La madre de Marikula, la estava yamando para komer por midi. Ma, Marikula no keriya deshar el djugo. La yamo una vez, dos vezes… Marikula no viene.. A la fin ampeso a gritarla, dizyendo: Marikula presto ven a kaza te esto dizyendo! Si no vienes pishin, les va dizir a los judios ke te fuygan i ke te metan al varil kon klavos. Mi mama estava aya i lo oyo esto. Vos dizere ke akel tiempo muestros padres konosiyan el grego muy bien. I la madre de Marikula era amiga de mi mama. No se averguenso del todo de dizir estas kozas delantre de mi mama. Siguro ke mi mama no disho nada i esto se olvido.
Vos kero dizir esta istoria no se olvido. Esto ke vos konti afito en los anyos de 1960, puedeser ke esta difamasyon egziste dainda. No savemos. No kedaron munchos gregos mas aki. Kale demandar a los ke biven en Gresya.
