El 16 Febrero, dia de lunes las koristas i el shef del koro NES, desidimos de ir a ver la pyesa “PERA´NIN KADINLARI”.
Por siguro la primera ke dishe okey fui yo. Kuando se dize teatro, para mi, komo dize el proverbo turko “AKAN SULAR DURUR” (las aguas korrientes se kedan).
Ken fue ke mos izo ir a ver esta pyesa perfekta, byen djugada, emosyonante i divertida kon sus kantikas? DAFNE BERİ, myembro de antes munchos anyos, del koro ESTREYIKAS D’ESTANBOL i eleva del shef İZZET BANA.
El sujeto muy ekstraordinaryo i enteresante, de kuatro mujeres byen famozas, ke les paso la vida en Pera (oy Beyoğlu).
Pera, un tyempo, la kapital de istoryas diferentes, un sentro majiko yeno de kulturas.
Una de las mujeres era NİGAR HANIM (Gülşah Gül) poeta ke de sus poezias se kompozo kantikas. La segunda, baronesa rusa VALENTİNA TASKİN, (Buse Özgel); la tresera CAHİDE SONKU (Banu Şahin) la famoza artista de teatro i sinema i la kuatrena MADAM ANAHİT (DAFNE BERİ) tanyedora de akeordeon, konosida por todos los ke vijitaron Çiçek Pasajı.
Estas mujeres se reunaron en la shena kon una boz, kon unas notas kon kantikas, kontando sus rekuerdos.
Malgrado la shena chika, sin komodidad, una prezentatora i kuatro djugaderas sin falta, mos fasinaron i mos enfluyeron.
Vos rekomendo ke vayash i veash esta pyesa maraviyoza.
Te rengrasyo DAFNE BERİ i te oguro estas i munchas.
