Nasido en 1904, en una sivdad de la rejion sentral de Chile, en una famiya judia de Parral, Ricardo Eliezer Neftali Reyes Basoalto, despues konosido komo Pablo Neruda, fue uno de los mas konosidos poetas del siglo 20. Aparte de ser artisto, el fue senator de la republika chileana, miembro del partido komunisto i ambasador en Fransia.
En 1920-1921, Eliezer Neftali empeso a eskrivir sus poemas kon el nombre Pablo Neruda afin de evitar su padre ke no keria un ijo poeta. Este nombre lo eskojo a la memoria del poeta Chech Jan Neruda i despues lo legalizo. En su epoka komo estudiante, Neruda tuvo una vida de bohemio i se dediko a la lektura i a la eskritura de sus poemas.
En 1923, Neruda publiko su primer livro el “Crepusculario” i resivio buenas kritikas. En 1924, kuando tenia 20 anyos, eskrivio su ovra la mas importante: “Vente poemas de amor i una kansyon dezesperando”. Esta ovra fue tradusida a munchas linguas i su fama mundial empeso komo el “poeta del amor”.
Desde el anyo 1927 su vida diplomatika empeso i se izo konsul de Birmania, Colombia, Sri Lanka, Jakarta i en 1931 konsul en Singapore.
En 1932, Neruda torno a Chile. Durante sus estados en tierras orientales, el eskrivio munchos poemas ke formaron una parte de su livro “Rezidensia en la Tierra”.
En 1933, fue konsul en Buenos Aires i tuvo la oportunidad de konoser los grandes otores i poetas komo Jeorje Louis Borges i al espanyol Garcia Lorca. Un anyo despues fue konsul onorado en Barselona. En julio 1936, la gerra sivil espanyola avia empesado. El frankizmo, una diktatura militar ke torturo a sus oponantes durante munchos anyos. Neruda se izo komunisto para luchar kontra el fashismo. Ma en el anyo 1948, el komunizmo fue prohibido i Neruda fue ovligado de fuirse de Chile. En 1952, kuando torno a su paiz, fue al lado de Allende, el sosyalisto. Allende lo embiyo a Paris komo ambasador.
En 1971, Neruda resivio el Premio Nobel de la Literatura. En 1973, kuando Pinochet, el diktador vino al poder, Neruda estava enfermo en un ospital, onde perdio la vida. Asta oy su muerte kedo sospechoza porke el era kontra Pinochet.
El poeta del amor Pablo Neruda, tuvo una vida muy ajitada. Guerfano de la parte de su madre, su edukasion i su kuriozidad profunda lo meno a bivir una vida de munchas kolores. Se izo namorar del mundo kon sus palavras a traverso sus poemas.
Terminaremos kon una fraze de amor del poeta: “Amo tus pies ke kaminaron sovre la tierra, sovre el viento i sovre la agua, fista ke me enkontraron.”
