Komo savemos, kada fraza, kada biervo de la Tora es un mesaje, i mizmo kada letra komporta un sekreto. Las traduksiones malorozamente no son sufızientes para aklararmos.
Me gustariya aklararvos sovre el Livro de Bereshit, de la tresera Perasha, del LEH LEHA, una fraza ke es atada a Avraam Avinu, i de un artikolo de Daniel el Profeta ke komporta un paralelizmo. “I Avraam kayo a un eshuenyo profundo ensima de el (EYMA) Espanto, (HA SHEYHA) Eskuridad, i (GEDULA) Fuersa o (Poder grande) (NAFLA-ALAV) le kayo enriva".
Todas estas palavras reprezentan el Galut ke va endurar el puevlo Judio.
Espanto: El Galut de Babel ke destruyo el Bet-Amikdash.
Eskuridad: El Galut de Med-Pers.
El Poder grandiozo: El Galut Grego ke destruyo el Segundo Bet-Amikdash, El Galut (EDOM ROMA)
El Midrash dize: Kada Tribu de Israel va rezistir a kada una de estas fuersas. Enfrente de Babel YEHUDA, kontra la Persia (BENYAMIN Tribu de Mordehay) Kontra el Grego, (Tribu de Levi) MATATIAS Kohen Agadol i los ijos los MAKABIS. Kontra Roma YOSEF, fin la vinida de MELEH A MASHIAH.
Tornaremos a la Deklarasion del Profeta DANIEL. En 536 A.J. Babel konkistando el Reynado de Yehuda i destruyendo el Bet-Amikdash, ekspulzo spesialmente los Nobles Judyos, i los Kohenes, i los del entorno al Galut de Babel.
El famozo Rey NABUKADNEZAR en su Palasyo detuvo kuatro mansevikos Judyos de famiyas Noble. Estos mansevikos eran muy intelijentes i valorozos DANIEL, HANANYA, MIHAEL i AZARYA. Se elevaron i se engrandesyeron en el Palasyo. Daniel kon tyempo adelanto i arivo a un posto alto.
El Rey tuvo un suenyo ke lo angusyo muncho, ma no se akodro lo ke vido. Los savyos, los ichizeros, dingunos no pudyeron eksplikar el suenyo olvidado. Renomado por su intelijensya, Daniel fue yamado a la prezensya del Rey. “Komo rezolver esta enigma? Dyo Santo amostrame kamino, arelumbrame" Majestuozo Rey en tu suenyo te se prezento una Estatua Jiganteska, su kavesa de Oro, su abdomen i sus brasos de plata, las nalgas de kovre, las piernas de fierro i de barro. I en supito una chika piedra kayo enriva de la statua monstruoza ke se izo en mil pedasos, se dezazyo en tierra. Ma la chika piedra se engrandesio mas i mas, se izo una montanya jiganteska.
Las palavras de Daniel kontinuan: Rey Soverano oyeme, despues de ti va aver otros Reynados, ma todos se van a destruir, dispersar komo barro, ma el Rey de los sielos ASHEM ke es el empesijo i la fin, reynara eternelmente.
El Rey se enkorvo delantre de Daniel, en ekslamando: "Muestro Dyo, Rey de los Reyes lo entendi, lo vide, lo konosi.”
Todo modo de Reynado es kondanado a espareser komo la umanitad. VANITA VANITA todo es VANITA. Meldamos en Sukot el KOHELET.
Daniel mos avla areskuramente de la fin de los tyempos, i alkavo “Serra el livro Daniel lo avreras a la fin de los tyempos” Palavras ke mos azen pensar.
Manyanas buenas keridos.
