El 5 de Febrero se komemora la disparisyon del Padre Thomas ke es la data del empesijo del libelo de sangre en Damascus, ansi, kije eskrivir sovre este kavzo ke es un pasaje triste en la istoria Djudia.
En 1840, un papaz i su sirvyente dezaparesyeron, i un grande shifro de Djudios fueron akuzados de asasinarlos para empleyar sus sangres por rituales relijyozos. Este tipo de akuzasyones se yaman "libelo de sangre", ma asta esta data se limito a los Djudios Ashkenazis de la Evropa kristiana. Asta esta data solo una vez afito en el Imperyo Otomano en el anyo 1530 en Amasya i Tokat ma no sureyo muncho. La fiksyon ke los Djudios nesesitan sangre para la matza i el vino era una envento Kristiyano i no arabo. Por lo tanto, en los paizes muzulmanos, los libelos de sangre eran deskonosidos, aunke los Djudios sufriyeron en estos paizes otras persekusyones.
Esto troko al empesijo del siglo XIX kuando Fransya kolonizo Siria i lo ke oy es el Líbano. Komo parte de la erensya de la kultura oksidental, los fransezes trusheron kon eyos la orivle mentira ke los Djudios tomavan la sangre de los non-Djudios i la utilizavan por rituales relijyozos.
El libelo de sangre en Damascus fue un akto spesyalmente desgustante, en savyendo ke el Konsul fransez ke lo promuvyo, Ulysse de Ratti-Menton, un antisemito konosido, era enteramente konsiente ke las personas desaparesidas fueron matadas por un skandalo muncho mas mundano, ke no teniya dariyaver kon la komunidad Djudia. Ma, por razones politikos, la Fransiya i su konsul kijeron investigar el kavzo de esta manera. Por lo tanto, las otoridades turkas arestaron a los lideres de la komunidad Djudia de Damascus. Basho una tortura larga, las otoridades bushkaron a oyer una konfesyon ke se aviya kometido un asasinato ritual. Es syerto ke, debasho tortura, se puede reushir a azer dizir lo ke se kere.
Durante el kavzo se empozo una grande suma a pagar a la Komunidad Djudia de Damascus. Munchos rabinos fueron arestados i syertos muryeron en prizyon. El resto del mundo Djudio se alevanto indinyado. El filantropo Djudio, Sir Moses Montefiore tomo la inisyativa para dezmentir la akuzasyon, viyajando desde su kaza en Londra a Damascus. Los turkos otomanos no estavan muy kontentes de su venida, ma komo viyajava kon pasaporto diplomatiko britaniko, el i su mujer resivyeron todas las onores, i ansi pudo presyonar al Sultan asta ke todos los prizonyeros restantes fueron liberados. Poko despues, el Sultan emityo un orden ofisyal ke defendiya en el Imperyo Otomano un libelo de sangre komo este:
“… i por el amor ke sintimos verso muestros suditos, no puedemos permitir ke la nasyon Djudia, por los kualos la inosensiya por el krimo ke se pretende es evidente, se preokupe i ke bivan kon espanto komo konsekuensa de akuzasyones ke no tyenen el menor fundamento en la verdad..."
Ma mirando despues, malgrado la viktorya final, el libelo de sangre de 1840 reprezento un shok para el mundo Djudio. Los Djudios kreiyan ke el mundo lo aviya deshado en el pasado, spesyialmente en el Oksidente, estavan konvensidos ke la kultura oksidental no tolerariya mas ías mentiras tan terivles. Ma, malorozamente, el spektro del odio medieval torno de muevo, puedeser en otras formas, afilu en muestros tyempos.
