Me namoro de irme a Paris. La Lingua, la muzika, la djente, las kayes, los monumentos siguramente la Gastronomiya me plaze muncho. Kada vez ke me vo no me enfasyo de ir al Boulevard de Champs Elysées i al Arc de Triomphe a la Tour Eiffel, a Montmartre i a la Bazilika de Sacre Coeur, a la Katedral de Notre Dame, a las guertas de Luxembourg i de Tuileries, la Plasa de Concord, al Muzeo de Louvre, al sentro de arte de Pompidou. El sentro de Saint Germain des Pres es muy shik kon munchos restorantes, kafes, i botikas ke son markas i ke se topan aki. Me plaze azer el tur kon Bateaux Mouche en el rio Seine. Las noches tambien se azen estos tures; ay tures kon komer o sino solo komo hop on hop off, azesh el tur viendo Paris de la agua i en mirando los kupris ke pasash debasho. Si keresh, las noches vos puedesh ir a los revus en la kaye de Champs Elysées. Ay Lido o si no en el sentro de Pigale ay Moulin Rouge. En dizyendo noche, los lugares ke vos eskrivi ariva, las noches debasho de las luzes son muy ermozo tienen muy buena vista. En el sentro Djudyo ke es el sentro Le Marais ay Sinagogas, restorantes, marketes, kasapes ets. Tambien en la Rue Richer se topa Sinagogas i restorantes i patiserias i Kebapchis Kasher. Aki ay munchos Marokanos i Tunislis, por esto puedesh topar Kebapchis i Sinagogas Sefardis. En la kaye ke se yama Rue de La Victoire, i Rue St. Lazar ay dos Sinagogas muy grande Ashkenazi.
La Gastronomiya no ay kualo dizir. Ya se save en el mundo entero La manera de gizar es muy diferente i orijinal. Las soses ke se meten a las komidas, munchas reseftas se dize ke salyeron de aki. La supa de Sevoya, el Kish, las karnes o las gainas ke se kozen kon vino es muy enteresante. Komo Coq Au Vin i Boeuf Bourguignon. Los peshkados i los produktos de mar los gizan kon diferentes soses; la savor es de chupar los dedos. Los Fransezes kon vino blanko komen Escargots à la Bourguignonne. Por eyos es komo un rituel i azer keyf estas komidas. Ratatouille es una komida tradisional. Unos kuantos anyos antes kon este nombre izyeron un filmo para konoser la gastronomiya de los Fransezes.
Si vinimos al sujeto de la eskriturya “Los Dulses”, tambiyen i los dulses son muy renomados. El Sufle Chokola, el Makaron, el Kreme Brule, el Krem Karamel, el Profiterol, el Peche Melba ke se apareja kon dondurma, fruta i Krem Shanti, se mete aryento de una kupa alta ke se yama Kup. El Mousse au Chocolat ke lo eskrivi en empesando a la eskriturya komo estas munchas dulsuryas, salyo de aki i se empeso azer en el mundo entero.
