Leonard Cohen nasio en Montreal, Canada, en 1934, en una famiya profondamente judia: Su nono era rabino. Su padre era shastre. Kuando su padre se murio, Leonard tenia mueve anyos. El lugar vaziyo de su padre lo sintio siempre… i lo impulso a bushkar al Dio. El judaizmo estava en su alma komo una etiketa. Mezmo ke el mundo lo konsiderava un poet sekular, Cohen nunka abandono su identidad judia. Al kontrario, esta identidad la konvertio en sus kantikas. ‘’No tengo dingun konflikto kon esto. Nunka inyegi mis raizes’’ diho Leonard.
Kuando Israel lo yamo… el respondio de vista. En 1973, durante la Gerra de Yom Kipur, el disho ke kere azer todo lo posivle para ayudar al pais. Leonard Cohen se bolo a Israel sin presa, sin espektakulos, sin paras. Kanto por los soldados en el dezierto. Por los soldados kansados i feridos. Aya prononso una de sus frazes las mas profondas: “Esto aki porke so judio”. No por politika. No por fama. Solo por apartenensia’’
Durante la gerra, Leonard estava aziendo planes. Kantar por los soldados no le aviya vinido al tino. Penso ke puediya ser volontario en un kibutz para ayudarles porke los mansevos del kibutz estavan en la frontiera. Kuando arivo a Tel Aviv, rankontro un amigo. El amigo le disho ke se estava indo a Sinai, si kere ke venga kon el, aya puediya kantar por las tropas. Es ansi ke Leonard puediya ayudarles. Leonard aksepto su propozisyon.
En su primer dia kantando para las tropas, Cohen topo un lugar trankilo para eskrivir una kantika: "Lover Come Back to Me". El tema de la kantika es un dezeo ke las tropas de Israel seygan protejadas.
En el livro de Jeff Burger, ‘’Leonard Cohen on Leonard Cohen’’: Interviews and Encounters: Leonard disho “Kuando meldo los Psalmos o kuando elevan la Tora, kero ser el ke eleva la Tora. Kero vistir ropa blanka, entrar en el Santo de los Santos i negosiar kon lo mas profondo de mi alma… Leonard era orgoyozo de ser judio i aviya dicho: «Esto eredando una relijion ekselante, no tengo menester de trokarla...
Leonard investigo el budizmo i se konvertio a un budisto en Los Angeles, ma malgrado esto kedo un judio fidel.
En una okazion le disho a Arthur Kurzweil: «En la Shema... solo una koza akontese i no aze aluzion a otra koza. Ay una unidad absoluta ke se manifiesta en este plano i en todos los planos, i nada puede ser perikolo por este entendimyento’’.
El padre de Cohen era shastre, i Cohen era konosido por vistirse kostum i chapeyo fötr, una vistimienta komun entre judios ortodoksos. Tambien se metiya tefilin.
Le konto a Kurzweil: «Duspues ke estudyi Zen por munchos anyos, kuando me rompi los dizes i no puide pratikar; empesi a pratikar el judaizmo, un judaizmo ke nunka aviya pratikado. Me metiya tefilin todas las demanyanas, repasava el Shemoneh Esreh i entendi ke realmente ke egzistian estos diziocho eskalones, una eskalera, i ke estos eran una forma de aparejarse para el dia, si realmente entendites kada uno de estos paragrafes. Aunke empesates de un lugar muy abasho, puedias alevantar la keshada por ensima de la garnitura de la ventana i ver un mundo ke puediyas afirmar».
En el anyo 2013, Cohen kanselo una seria de konsiertos en el Reinado Unido por modo de la bruma.
