No ay dia ke no ay una selebrasyon. Dia de medikos, de farmasyenes, de dantistes i munchos mas.
Komo todo i esto se egzajero, en pasadas meldi “dia de komer simit”, dia entero me riyi.
El 14 febrero se deklaro komo dia de Amor de kerensya de amantes no se kualo. En las kayes todos kon un buketo de rozas koloradas ken i ken la mas mijor, en fin los vendedores de rozas ke ganen moneda.
Do muncha emportansa a los dias espesyal, komo aniversaryo de anyos, komo aniversaryo de kazamyento. Ma dia de las madres no kale ke se fyeste solo un dia, porke las madres no kaven al anyo un dia, madre es kada diya, kada ora, kada punto.
Mezmo dia de Valentin, el amante oy esta, amanyana se va, kurto esto es mi pensamyento.
Por siguro ke ay amores inolvidavles. Myentres ke eskrivo en un dia de amor, vini meldaremos la istorya de amor de CHARLIE CHAPLIN, ke el mundo entero le echo kulpa i lo detesto.
Charlie Chaplin kon su baston, kon su kaminado i kon sus mustachos izo riyir a milyones de djentes en tyempo de gerra, de provedad i de dezesperasyon. Los ultimos dyez anyos de su vida es verda ke los paso sin palmas ma los paso orozo, kon repozo i kon pas. Estos ermozos anyos los deve a una estorya de amor a la kual muncha djente no se kreyeron.
En 1942 Charlie teniya 54 anyos i era el mas famozo ombre del mundo entero. No aviya ken no lo konosiya, sus filmos se estavan djugando en todas las sivdades ma malorozamente su vida privada estava muy mala. Tres kazamyentos malorozos, todas sus mujeres mansevas, muncho mas chikas de el, todas sus relasyones eskaparon kon problemes.
Las revistas mas no lo estavan alavando, al kontraryo lo estavan arebashando i estavan bushkando un skandalo. El, povereto se sintiya malorozo i solo, estava en bushkida de una koza ma ni el no saviya kualo.
Entonses en Los Angeles, se konosyo kon Oana O’neill, ija del famozo eskritor de pyesas de teatro Eugene O’neill. El eskritor divorsado de su mujer, estava muy kontra de esta relasyon porke Oana teniya 18 anyos Charlie 54. Ma este renkontro troko la vida de Charlie enteramente.
El mundo estavan kontra de este kazamyento portanto sus amor estava pujando den dia en dia, no dyeron importansa a los 36 anyos de diferensya ni a nada, el 16 de junio en 1943 se kazaron.
Todos se revoltaron, disheron ke este kazamyento no kontinua, disheron esto es un skandalo ma de no kreyer, Charlie troko enteramente, se salvo de su melankoliya, de sus kaprichos i Oanna topo la afeksyon de padre ke no topo en su kaza.
En 1952 tomaron una envitasyon por una nochada de gala, de un filmo en Londra. En partyendo a Londra Charlie tomo un haber ke el governo Amerikano anulo el permiso de rezidensia; no era posivle tornar i lo kito del paiz. Charlie estava furyozo dospues de bivir 40 anyos en los Estados Unidos este ekzilo deke???
El puediya kedar en Londra sin su mujer i empesar una vida mueva ma no kijo, renonso a todo i se fueron a bivir en Suisa. Todos le demandaron deke no kedo en Londra en el paiz ande nasio.
El les respondyo “una vida sin Oanna no es vida”.
En Suisa krearon una vida i una famiya ke dingunos no asperavan.
Tuvyeron 8 ijos, Charlie estava orozo kon el bruido i las rizas de las kriaturas; dia entero djugava kon eyos i las noches eskriviya, el ke aziya riyir al mundo agora estava riyendo kon sus kriaturas alegre i kontente.
Un amor puede trokar una vida.
Charlie CHAPLIN muryo un dia de Noel en el anyo 1977 a los 88 anyos.
