"Mi nono es el mas grande asesino de la istoria de umanidad" disho Kai Höss, inyeto del komandante del kampo de konsantrasion de Auschwitz, Rudolf Höss, en una entrevista.
El inyeto del komandante de Auschwitz deskuvrio el sekreto de su famiya en una klasa de istoria sovre el kampo de konsantrasion de Auschwitz. "Este nombre, Rudolf Höss, estava eskrito komo mi alkunya. Akel dia me fui a kaza i le demandi a mi madre. Le dishe: 'Mama, es pariente muestro? Tenemos alguna relasion?'. Mi madre me respondio: 'Sí, es tu nono'".
"A partir de este dia, mi vida troko por entero. Estava sintiendo verguensa. Una de mis primeras reaksiones fue pensar ke todo el mundo lo save; ke los elevos lo saven, ke los profesores lo saven". Ma eyos no lo savian.
Kuando Kai tenia 17 anyos, enkontro el livro "El Komandante de Auschwitz" yeno de rekuerdos de Rudolf Höss. En meldando, se le rompio el korason.
"Todo lo ke izo en Auschwitz estava eskrito en el livro". Estava avlando de su chikes i de komo Himmler lo yamo a Berlin para darle el orden de konstruir el kampo. Ay munchas istorias ke te rompen el korason. Istorias realmente trajikas de asesinatos, i las esta kontando en la primera persona".
Duspues ke las meldo, la primera reaksion de Kai fue pensar kualo puediya azer. Duspues de unos kuantos anyos, por la primera vez, Höss vijito Auschwitz. Una de las partes las mas difísiles de Auschwitz para Kai fue la plataforma de Birkenau, ande se aziya la seleksion, ande sienes de miles, milyones de judios abashavan del treno, vagones de judios de toda Evropa, en kondisiones inumanas, i komo eran divizadas entre la siedra i la derecha. "I les diziyan: 'No vos inkyetesh, mos vamos a okupar de vozotros, vos vamos a dar a komer, i vash a tomar una dush kayente’. Unas kuantas oras duspues estas personas fueron asasinadas i kemadas’.
"Estava muy klaro ke ivamos a kontar a todos ken semos, de ande vinimos, i ke muestra responsabilidad era de ayudar a Israel i amostrar al mundo ke lo ke afito aya era orivle, i ke devemos de defender la verdad".
Höss desido de no versen kon los parientes del lado de su nono porke no kerian admeter ken Rudolf era. La vida de Höss estava yena de negras aksiones.
Kai lavoro komo shef, i estudio turizmo, i mas duspues, se izo papaz en Alemanya. En 2003, partisipo a la komunidad evanjelika (evanjelistas ke ayudan a kristianos komo a judios) en Stuttgart.
Durante munchos anyos, Kai estuvo avlando sovre los asasinatos de su nono. Aparte de esto, del Olokosto, de la emportansa de la memoria, de su opozision al antisemitizmo i al neonazizmo, de la nesesidad de ambezar lesones de la istoria i de los peligros de las ideolojias ekstremas. Kon el trokamiento de la persepsion al nazizmo en Alemanya i en el mundo, kuando la ideolojia del Neo-Nazizmo empeso a topar munchos partizanes, Höss disho ke ver estos trokamientos le esta rompiendo el korason.
