La gazeta Şalom, en entrando al anyo muevo, uza organizar una reunyon para rekompensar a sus otores. Seya del Şalom, seya de la revista i de EL AMANESER. Los organizatores, este anyo kedaron ovligados de trokar la data porke aviya munchos achakes.
Enfin, el 7 de Febrero fuimos envitados a un restorante nombrado “ŞANS”. Un espasyo chiko ama muy ermozo, la komida de midi muy elegante, sovre todo el dulse de alkavo una maraviya. El direktor editoryal, İVO MOLİNAS tomo la palavra i remersyo a todos los eskrivanos i termino kon estas palavras: “si no ay eskritores no ay gazeta”.
Dospues tomo palavra EDNA, del departamento de publisidad ke es muy emportante, kon una surpriz de una kantika byen konosida, adaptada a la sinyifikasyon del dia, remersyo a todos los ke kontribuyeron. Sera ke estava emosyonada, se olvido de remersyar a la editora de las pajinas del ladino i del AMANESER, muestra kerida KAREN GERŞON ŞARHON, ke pena i lazdra para topar eskritores, melda las eskritas, las edita i las manda a publikar.
KAREN ŞARHON en nombre de todos los eskritores de ladino, te remersyo por tu pena i por tu responsabilidad.
Ayegados a los syen anyos kon todos djustos.
