Mozotros semos la primera jenerasyon ke resivimos keshas de muestros paryentes, de muestros ijos. La mueva jenerasyon mos estan inyorando. No estan dando emportansa a los grandes.
Las personas estan ovligados a tomar desizyones muy rapidamente, estan trokando la manera de sus vidas muy presto, estan renovando konstantamente sus modos de komportamyento sosyal. Nesesitan akselerar sus kapachitas de persepsyon.
En muestro tyempo, mos arrekojiyamos para produsir solusyones, tener relasyones kon la famiya, amigos, komunita,… Malorozamente esto todo no egziste mas. Estos konseptos oy se estan konsiderando komo obstaklos. La teknolojiya se puede trokar, i se deve de trokar. Kon esto tyenen una koza para ofreser a las jenerasyones mansevas. Por egzempyo, demandan kestyones a los ijos, son kuriozos, miran kon un ojo ke estan kritikando, no se espantan de las kozas muevas, lavoran kontinualmente, toman leson de los yerros, pensan libremente, son kreativos, miran todo modo de kozas kon un ojo diferente. Las sosyedades ke pueden ensenyar, ambezar esto todo tyenen munchos avantajes.
Por esta kavza, el oksidente kreo un espasyo de atraksyon.
Agora mos demandaremos: Es ke mozotros mos engrandesimos en una ambians de komportamyento ke vamos a ser modeles a los mansevos?
Mozotros mos engrandesimos en un dor ande la enformasyon teniya una grande valor. Eyos estan tratando de ambezar sovre la konsyensya.
En konklusion, lo ke estamos vyendo oy komo keshas, no tyene dinguna valor allado de la manseves.
No pueden bivir komo mozotros, porke no puedemos entender la vida ke tyenen, komo eyos. Semos personas de una epoka en la ke el konosimyento era emportante. Eyos estan tratando de ambezar sovre la konsyensya.
La vida de la manseves esta muy difisil i va divinir mas difisil. Para ke puedan avrir kamino en el muevo mundo lo ke puedemos azer solamente, es ayudar a entenderlos, darles mano para lo ke tyenen menester.
A lo ke estamos vyendo, la manseves eskapava la universita i teniya una profesyon, topava kon muncha fasilidad un echo.
Una dioploma sola no esta abastando oy para topar un echo komo kale.
Kale saver a lo manko dos linguas para reushir. Los mansevos deven de luchar kon munchos problemes, komo topar eskola buena para los ijos i abasteser a los gastes, pueder okuparse de la madre, del padre i munchas otras kozas… El stres de esta kompetisyon kon otros, en la sosyeta esta forsando los mansevos a retirarsen i a bivir en la soledad. Los mansevos de oy son la primera jenerasyon ke estan komunikando sin el kontakto de los ojos.
Los paryentes ke son lo mas de la jenerasyon de los sesenta i de los setenta, se engrandesyeron kon otorita severa.
“Dar liberta a las kriaturas” fue la reaksyon a la otorita de la kuala los paryentes sufriyeron en sus manseves.
El manko de otorita fue el kavzo del egoizmo ke ay en la manseves de oy.
La komunikasyon entre las jenerasyones de los ijos kon mozotros, se esta redusyendo den dia en dia.
Los mansevos de oy malorozamente no se keren kazar, no keren tener ijos, no keren tener ovligasyones ni responsabilidades.
La vida en el mundo entero esta muy difisil para todos.
